NIA Raids In Goa: राष्ट्रीय तपास यंत्रणेने (एनआयए) पथकाने तिस्क उसगाव येथे छापा टाकला. ही कारवाई एनआयए पथकाने फोंडा पोलिसांच्या मदतीने केली. या कारवाईत एका अल्पवयीन मुलाचा फोन जप्त करण्यात आला आहे. देशविरोधी कारवाई संदर्भात चौकशी केल्यानंतर पथक माघारी फिरले.

याबाबत अधिक माहिती अशी की, एनआयएच्या पथकाने झारखंडशी संबंधित एका प्रकरणाच्या संदर्भात तपास करण्यासाठी गोवा गाठले. पथकाने फोंडा पोलिसांच्या मदतीने तिस्क उसगाव येथे छापा टाकला. या छाप्यात एका अल्पवयीन मुलाचा फोन जप्त करण्यात आला. या दहावीत शिकणाऱ्या संशयित विद्यार्थ्याची सकाळपासून चौकशी सुरु होती.

संशयित अल्पवयीन मुलाचा मोबाईल, सिमकार्ड, पेनड्राईव्ह जप्त करण्यात आला आहे. तसेच त्याचे इंन्स्टाग्राम व टेलिग्राम खाते फ्रीज करण्यात आले. संशयित हा मूळ उत्तर प्रदेशमधील असून दहा वर्षांपासून कुटुंबीयांसह गोव्यात वास्तव्यास होते.