Baina Beach Beautification : मुरगाव तालुक्यातील बायणा समुद्रकिनारी क्षेत्रात सौंदर्यीकरणाच्या नावाखाली काही विकासकामे झाली होती. पण ते अवैध, समुद्र भरतीरेषेपासून १०० मीटर अंतरात तसेच ‘ना विकास क्षेत्रा’त येत असल्याचे सांगत तेथील जागा तीन महिन्यात पूर्वस्थिती करण्याचा आदेश राष्ट्रीय हरित लवादाने प्रकल्प प्रस्तावकाला दिला आहे.

हा आदेश राज्य सरकारसाठी दणका आहे असे मानले जात आहे. राजभाऊ पवार व गोवा फाऊंडेशनने या बेकायदेशीर बांधकामासंदर्भात राष्ट्रीय हरित लवादाकडे अर्ज दाखल केले होते. बायणा समुद्रकिनाऱ्यावर करण्यात आलेली विकासकामे ही बेकायदेशीर आहेत. ते क्षेत्र रेती समुद्रकिनारा तसेच ते क्षेत्र सीआरझेड - 1 मध्ये पडत आहे. 20 फेब्रुवारी 2014 मध्ये जीसीझेडएमएने या बांधकामाला बेकायदेशीपणे परवानगी दिली आहे.

हा प्रकल्प तेथे असलेली संरक्षक भिंत व रस्ता यामध्येच करण्याची अट घातली होती. मात्र बांधकामावेळी सौंदर्यीकरणाच्या नावाखाली तेथील समुद्रकिनाऱ्यावर असलेल्या रेतीच्या टेकड्या नष्ट करण्यात आल्या तसेच सीआरझेड नियमांचे मोठ्या प्रमाणात उल्लंघन झाल्याचे लवादाच्या निदर्शनास आणून देण्यात आले होते.