डिचोली: डिचोलीचा बाजार शालेय साहित्याने फुलला असून, खरेदीही सुरु झाली आहे. यंदाही आकर्षक रेनकोट आणि छत्र्यांसह शालेय साहित्य बाजारात विक्रीस उपलब्ध झाले आहे. बॅग्स, छत्र्या, रेनकोट या वस्तूंमागे किमान १० ते १५ टक्के रुपयांनी वाढ झाली आहे. तरीही उत्साहात खरेदी सुरू झाली आहे.

शहरातील बागायतदार बाजार या स्वयंसेवी दालनासह, वॅनसन्स, शिरोडकर आदी ठराविक दुकाने शालेय साहित्याने सजली आहेत. या दुकानांतून वह्या तसेच अन्य शालेय साहित्य विक्रीस उपलब्ध झाले आहे. काही दुकानांमधून रंगीबिरेंगी आणि विविध डिझाईनच्या छत्र्या, रेनकोट, बॅग्स आकर्षण ठरत आहेत. कार्टूनचे प्रिंट असलेले रेनकोट आणि बॅग्स तर लहान मुलांना आकर्षित करीत आहेत.

शालेय साहित्य विक्री करणाऱ्या दुकानांची संख्या वाढली आहे. तरीदेखील साहित्याला अजूनही मागणी आहे. काही पालक शाळा सुरु होण्याआधीच साहित्य खरेदी करतात. तर काही पालक शाळेतून मिळणाऱ्या यादीनुसार साहित्य खरेदी करतात. आमच्या दुकानात शालेय साहित्यामागे २० टक्के सूट देण्यात येत आहे, असे दुकानदार कॅजीटन वाझ म्हणाले.