New Zuari Bridge Accident

तिसवाडी: नवीन झुआरी पुलावर झालेल्या दोन दुचाकींच्या अपघातात अन्वर सय्यद (मडगाव) याचा मृत्यू झाला. आगशी पोलिसांनी पंचनामा केला असून अतिवेगाने आणि बेजबाबदारपणे दुचाकी चालवून अपघात केल्यासंदर्भात हेमंत थामन्नागावडा (वय २४ वर्षे, रा. हासन, कर्नाटक) याला अटक केली आहे, अशी माहिती आगशी पोलिस निरीक्षक अनंत गावकर यांनी दिली.

हा अपघात ६ नोव्हेंबर रोजी सायंकाळी ६ च्या सुमारास झाला. सय्यद जीए-०८-एआर-७७२४ या क्रमांकाच्या दुचाकीवरून पणजीहून मडगावला जात असता हेमंत याने जीए-०८-व्ही-६८१७ या क्रमांकाच्या दुचाकीवरून येऊन सय्यदच्या दुचाकीला जोरदार धडक दिली.

सय्यद उसळून रस्त्यावर पडून गंभीर जखमी झाला. गोमेकॉत दाखल केले असता उपचारादरम्यान त्याचा मृत्यू झाला. आगशी पोलिसांनी हवालदार उदय पालकर यांच्या तक्रारीवरून भारतीय न्याय संहितेच्या कलम २८१, १०६ (१) गुन्हा नोंद केला आहे.