Goa Mining : गोव्याच्या खनिज उद्योगाचा नवा अध्याय आजपासून सुरू झाला आहे, असे मानावे लागेल. कारण सरकारच्या खनिज आणि भूगर्भशास्त्र खात्याच्या वतीने जाहीर केलेल्या ई-लिलावात ब्लॉक क्र. 1 डिचोलीसाठी इतर पाच कंपन्यांसह वेदांता खाण कंपनीने बोली लावली होती. बुधवारी झालेल्या ऑनलाईन अंतिम बोलीमध्ये वेदांताने सर्वाधिक 63.55 टक्के महसुलाची बोली लावत ही खाण आपल्याकडेच ठेवण्यात यश मिळवले आहे, अशी माहिती मुख्यमंत्री डॉ. प्रमोद सावंत यांनी दिली.

मुख्यमंत्र्यांच्या आल्तिनो येथील निवासस्थानी आयोजित पत्रकार परिषदेत ते बोलत होते. यावेळी मुख्य सचिव पुनितकुमार गोयल, खाण आणि भूगर्भशास्त्र संचालक डॉ. सुरेश शानभोग उपस्थित होते. गुरुवारी शिरगाव-मये ब्लॉकचा लिलाव होणार आहे. लिलावास पात्र पाच कंपन्यांनी 63 टक्के महसुलाची प्राथमिक आधारभूत किंमत दिली होती.

ही किंमत आधारभूत मानून खात्याच्या वतीने अंतिम बोली जाहीर केली. त्यावर टप्प्या-टप्प्याने 63.55 टक्के ही वेदांताची बोली जाहीर झाल्यानंतर पुढच्या आठ मिनिटांनंतर इतरांनी आपली बोली जाहीर केली नसल्याने वेदांताला खनिज उत्खननासाठी ही खाण मिळाली. या संपूर्ण ई-लिलाव प्रक्रियेतून 43 हजार कोटींचा महसुलाचा स्रोत मिळाल्याने खनिज उत्खननाचा नवा अध्याय सुरू झाला आहे, असे मुख्यमंत्री प्रमोद सावंत यांनी सांगितलं आहे.