Goa School Textbook News

पणजी: एप्रिल २०२५ पासून नवीन शैक्षणिक वर्ष सुरू होत आहे. या शैक्षणिक वर्षासाठी एससीईआरटी (राज्य शैक्षणिक संशोधन आणि प्रशिक्षण परिषद) सज्ज असून इयत्ता चौथी ते आठवी पर्यंतची पुस्तके त्या-त्या तालुक्यातील बीआरसीसी केंद्रात दाखल झाली असल्याची माहिती एससीईआरटीच्या संचालिका मेघना शेटगावकर यांनी दिली.

डिचोली, बार्देश, पेडणे, तिसवाडी, मुरगाव, केपे, सांगे, सासष्टी  या तालुक्यांमध्ये असणाऱ्या बीआरसीसी केंद्रात पुस्तके पोहोचली असून शाळांनी ती ताब्यात घ्यावीत यासंदर्भातले परिपत्रक लवकरच निघणार असल्याची माहिती शेटगावकर यांनी दिली.

नऊ तालुक्‍यांमध्‍ये प्रशिक्षण

दहावीच्या शिक्षकांसाठी ब्लॉकस्तरीय प्रशिक्षणाचे आयोजन १ मार्च ते १५ मार्च या दरम्यान आयोजित केले असून सुमारे ५,५०० शिक्षकांना कोंकणी, मराठी, इंग्रजी, हिंदी, सामाजिक विज्ञान, शारीरिक शिक्षण, विज्ञान आणि गणित या विषयांसाठी प्रशिक्षण दिले जात आहे. शिक्षकांची कोणतीही गैरसोय होऊ नये म्हणून एससीईआरटीने नऊ तालुक्यांमध्ये प्रशिक्षण कार्यक्रम आयोजित केला आहे. यामध्ये पेडणे, बार्देस, तिसवाडी, मुरगाव, सासष्टी, काणकोण, डिचोली, सत्तरी,फोंडा, धारबांदोडा, सांगे आणि केपे तालुक्यांचा समावेश आहे, असे त्या म्हणाल्या.