Goa Medical College : गोवा वैद्यकीय महाविद्यालय आणि रुग्णालयाला नॅशनल मेडिकल कमिशनने आणखी नवीन चार एमडी (पदव्युत्तर) अभ्यासक्रम सुरू करण्यासाठी परवानगी दिली आहे.

आगामी 2023-24 या शैक्षणिक वर्षात हे अभ्यासक्रम सुरू केले जातील. ही जीएमसीच्या शैक्षणिक कारकिर्दीतील ऐतिहासिक कामगिरी आहे, असे मत आरोग्यमंत्री विश्वजीत राणे यांनी व्यक्त केले.

मंत्री राणे म्हणाले, नॅशनल मेडिकल कमिशनने जीएमसीला जेरियाट्रिक मेडिसीन, इम्युनोलॉजी, हेमॉटॉलॉजी आणि रक्त संक्रमणामध्ये एमडी प्रोग्राम सुरू करण्यासाठी परवानगी दिली आहे. यामुळे एमडी प्रोग्राममध्ये आणखी चार जागा जोडल्या जातील.

नव्या शैक्षणिक वर्षापासून हे अभ्यासक्रम सुरू केले जातील. गोवा वैद्यकीय महाविद्यालयाच्या या कामगिरीबद्दल मी गोवा मेडिकल कॉलेजचे अधिष्ठाता, त्यांचा कर्मचारी वर्ग यांचे अभिनंदन करतो. हे अभ्यासक्रम ‘एम्स’सह देशातील काही महत्त्वाच्या वैद्यकीय महाविद्यालयांत उपलब्ध  आहेत.