काणकोण: काणकोणमध्ये गुरुवारी विविध भागात नव्याने पुन्हा दहा कोरोना पीडित रुग्ण सापडले आहेत. आतापर्यंत ६२२ लोकांना कोरोनाची लागण झाली आहे. त्यापैकी ४९५ रुग्ण बरे झाले आहेत. दहा रुग्ण आतापर्यंत कोरोनामुळे दगावले आहेत.

सध्या काणकोणात कोरोनाचे ११७ सक्रिय रुग्ण आहेत. आज सापडलेल्या दहा रुग्णांपैकी आठ रुग्ण काणकोण पालिका क्षेत्रातील आहेत. त्यामध्ये पाटणे, चावडी व पाळोळे येथील प्रत्येकी दोन, नगर्से व देवाबाग येथील प्रत्येकी एक रुग्णाचा समावेश आहे. शिवाय आंबडे-खोला येथील एक व कर्वे-गावडोंगरी येथील एका रुग्णाचा समावेश आहे. हळूहळू परिस्थिती नियंत्रणात येत असली तरी अजूनही लोकांनी काळजी घेण्याची गरज बनली आहे. गर्दीच्या ठिकाणी लोकांनी जाणे टाळल्यासच कोरोनावर नियंत्रण येणार असल्याचे आरोग्य खात्याने सांगितले.

दरम्यान होम आयसोलेशनचा पर्याय निवडणाऱ्यांच्या संख्येत वाढ झाली आहे. होम आयसोलेशनमध्ये असणाऱ्या रूग्णांना उपचाराच्या गोळ्या, आॉक्सीमिटर असे सर्व साहित्य असलेले पॅक घरी पोहोचवले जात आहेत.