गेल्या बारा वर्षांपासून अधिककाळ रखडलेला मुंबई गोवा महामार्ग कधी सुरु होणार हा विषय आता एक कोडं बनून राहिला आहे. महामार्गाची दुरावस्था आणि त्याच्या समस्यांबाबत नेटकरी वारंवार पाढा वाचत असतात.

काही दिवसांपासून कोकणात सुरु असलेल्या सततच्या पावसामुळे मुंबई गोवा महामार्गाची दुरावस्था झाली असून, हा महामार्ग म्हणजे नितीन गडकरी, भाजपवर लागलेला काळा डाग असल्याची प्रतिक्रिया एक नेटकऱ्याने व्यक्त केली आहे.

"मुंबई गोवा महामार्गावर चिपळूण येथे नवीन बांधलेल्या बहादुर शेख नाका पुलाच्या मध्यभागी जॉईंटवर अँगलचे होल पास निघाल्यामुळे वरचे काँक्रीट निघून गेले आहे. यामुळे गाड्यांचा अपघात होऊ शकतो", अशी भीती या नेटकऱ्याने व्यक्त केली आहे.

जिथे हायवे तयार नाही तिथल्या सर्व्हिस रोडवर अनेक ठिकाणी मोठ मोठे खड्डे पडलेले आहेत. रिक्षा, टू व्हीलर ने प्रवास कसा करावा हेच समजत नाही. अनेक ठिकाणी तर हायवेला खड्डे आहेत, अशी व्यथा नेटकऱ्यांनी मांडली आहे.

एका एक्स युझरने महामार्ग २०१६ मध्ये पूर्ण होणे अपेक्षित होते मात्र, मुदत संपवून आठ वर्षे उलटली तरी अद्याप काम पूर्ण झाले नाही, असे त्याने म्हटले आहे. महामार्गावर झालेले खड्डे वाहन आणि प्रवाशांसाठी धोकादायक ठरत आहेत, असे त्यांनी म्हटले आहे.

एका युझरने मुंबई अहमदाबाद बुलेट ट्रेनचा मुद्दा उपस्थित केला. या कामासाठी दिलेल्या पैशांपैकी अर्धे पैसे देखील मुंबई - गोवा महामार्गासाठी दिले असते तरी कोकणातील लोक आनंदी झाले असते, असे त्यांनी म्हटले आहे.