म्हापसा: थिवी परिसरातील एका मुलीला फूस लावून पळवून नेल्‍याप्रकरणी कोलवाळ पोलिसांनी 25 वर्षीय मूळ नेपाळच्या युवकाला नाशिक येथून अटक केली आहे. सदर मुलगी 11 जूनपासून आपल्या घरातून बेपत्ता होती.

(Nepali youth arrested for abducting girl)

कोलवाळ पोलिसांनी दिलेल्या माहितीनुसार, राजू अनिल सुनार (रा. आकय-म्हापसा) असे अटक केलेल्या संशयिताचे नाव आहे. पीडितेच्या मोठ्या बहिणीने याप्रकरणी पोलिसांत तक्रार दिली होती. तक्रारीत तिने म्हटले होते की, आपल्‍या बहिणीचे एका अनोळखी व्यक्तीने अपहरण केले असून तिला अज्ञात जागी ठेवले आहे. त्यानुसार पोलिसांनी तपासाची चक्रे फिरवली.

पोलिसांना तपासावेळी या पीडित बेपत्ता अपहरण मुलीचे मोबाईल लोकेशन हे नाशिक-महाराष्ट्रात दाखवत होते. जे अंबाड पोलिस स्थानकाच्या कार्यक्षेत्रात येते. तेथू जाऊन पोलिसांनी संशयिताला अटक केली. तसेच मुलीची सुटका केली. या दोघांनाही गोव्यात आणण्‍यात आले आहे. या प्रकरणी संशयिताला अटक करण्‍यात आली आहे.

उपनिरीक्षक सोनम वेर्णेकर, हेड कॉन्स्टेबल अजय गावकर, रामा नाईक, सुधीर परब, कॉन्स्टेबल सुलेश नाईक, राजीव नाईक यांनी तपास कामात सहभाग घेतला. त्यांना पोलिस अधीक्षक शोबित सक्सेना, उपअधीक्षक जिवबा दळवी व पोलिस निरीक्षक सोमनाथ माजिक यांचे मार्गदर्शन लाभले.