म्हापसा: म्हापश्यात भरधाव कारने दुचाकीवरून जाणाऱ्या महिलेला धडक दिल्याची घटना समोर आली आहे. नियंत्रण सुटलेल्या कारचालकाने महिला आणि तिच्या लहान मुलाला १० मीटरपर्यंत फरफटत नेले. या घटनेची माहिती मिळताच स्थानिकांनी घटनास्थळी धाव घेत कारमधील चालकाला आणि अन्य पर्यटकाला अक्षरश: चोप दिला. या घटनेचा व्हिडिओ व्हायरल झाला आहे. कारमधील पर्यटकांनी मद्यपान केल्याचा आरोप स्थानिकांनी केला असला तरी प्राथमिक तपासणीत काहीही निष्पन्न झालेले नाही. पर्यटकांना वैद्यकीय तपासणीसाठी रुग्णालयात पाठवल्याचे समजते.

म्हापशा-शिवोली हाऊसिंग स्लोप येथे बुधवारी दुपारी अपघातामुळे काही काळ तणाव निर्माण झाला. महाराष्ट्रातून आलेले सहा पर्यटक एका कारमधून जात होते. चालकाचे भरधाव कारवरील नियंत्रण सुटले आणि त्याने विरुद्ध दिशेने येणाऱ्या दुचाकीला धडक दिली. यानंतर घाबरलेल्या चालकाने कारसह तिथून पळ काढण्याचा प्रयत्न केला. मात्र, या नादात त्याने एका ट्रकलाही धडक दिली. कार इतकी वेगात होती की कारने दुचाकीला तब्बल दहा मीटरपर्यंत फरफटत नेले.

या घटनेची माहिती समजताच जखमी महिलेचे नातेवाईक आणि अन्य ग्रामस्थांनी घटनास्थळी धाव घेतली. संतप्त ग्रामस्थांनी कारचालकाला आणि त्याच्या शेजारी बसलेल्या तरुणाला बेदम मारहाण केली. तोवर गोवा पोलिसांची पथकही घटनास्थळी पोहोचले आणि पर्यटकांना ताब्यात घेतले.

या घटनेमुळे परिसरात तणावाचे वातावरण निर्माण झाले होते. जमा झालेल्या नागरिकांनी पर्यटकांची वैद्यकीय तपासणी करण्याची मागणी केली आहे. हणजूण पोलिसांनी कार चालक आणि त्याच्या साथीदारांना ताब्यात घेतले असून या घटनेचा सखोल तपास सुरू आहे.

जखमी महिला कोण?

जखमी महिला ही स्थानिक असून ती तिच्या १२ वर्षांच्या मुलाला फुटबॉल मॅचसाठी सोडायला जात होती. या अपघातात दोघेही जखमी झाले असून त्यांना खासगी रुग्णालयात उपचारासाठी दाखल करण्यात आले आहे.