Parra News :

पर्ये, गोवा राज्य विज्ञान व तंत्रज्ञान मंडळ, साळगाव व राष्ट्रीय विज्ञान तंत्रज्ञान संचार मंडळ, दिल्ली यांनी संयुक्तपणे आयोजित केलेल्या ३१ व्या राष्ट्रीय बाल विज्ञान परिषदेमध्ये साखळीच्या डॉ. के. ब. हेडगेवार विद्यालयाची विद्यार्थिनी मनस्वी नंदा माजीक व वरदा वळवईकर यांनी सादर केलेल्या प्रकल्पाची निवड करण्यात आली.

गोव्यातील माध्यमिक व उच्च माध्यमिक विद्यालयातील विद्यार्थांनी या परिषदेत निरनिराळे प्रकल्प गोवा पातळीवर सादर केले होते. त्यातील केवळ आठ प्रकल्पाची निवड राष्ट्रीय परिषदेसाठी करण्यात आली.

मनस्वी नंदा माजिक व वरदा वळवईकर यांनी ‘कॉमन सीन ओडोनेट्स फाउंड इन सत्तरी’ हा प्रकल्प सादर केला होता. या प्रकल्पासाठी केरी सत्तरीतील येथील आजोबाची तळी, वाळवंटी नदी व शेतामधील परिसर येथे प्रामुख्याने सापडणाऱ्या (चतुरंग ) भिरमुंडी यावर अभ्यास केला आहे.

या प्रकल्पासाठी केपे महाविद्यालयाचे प्राध्यापक डॉ. संदेश गावस यांचे मोलाचे मार्गदर्शन लाभले. तसेच या प्रकल्पाच्या ‘फिल्ड वर्क’साठी नंदा माजीक व मीनल पाटील यांचे सहकार्य लाभले.

हा प्रकल्प भोपाळ येथे होणाऱ्या राष्ट्रीय विज्ञान परिषदेत मनस्वी नंदा माजीक सादर करणार आहे. विद्यार्थ्यांनी संपादन केलेल्या यशाबद्दल शिक्षण संस्थेचे अध्यक्ष उल्हास केरकर, पीटीए, मुख्याध्यापक सदानंद मिशाळ यांनी विद्यार्थ्यांचे कौतुक केले आहे.