फोंडा: पंचवीस वर्षांपूर्वी भारतातून नष्‍ट करण्यात आलेला ‘नारू’ नामक सुतासारखा पांढरा लांबलचक जंतू येथील खांडेपारमध्ये दृष्टीस पडल्याने खळबळ उडाली आहे. येथील पर्यावरणप्रेमी तथा आरटीआय कार्यकर्ते संदीप पारकर यांच्या घराजवळ हा धोकादायक जंतू आढळला असून त्‍यासंबंधीची माहिती आरोग्य खात्याला देण्यात आली आहे.

फेब्रुवारी २००० मध्ये जागतिक आरोग्य संघटनेने ‘नारू’ हा जीव भारतातून नष्‍ट झाल्‍याचे प्रमाणित केले होते. मात्र हा जंतू खांडेपार-फोंडा येथे आढळून आला आहे. या जंतूचा प्रादुर्भाव पाण्यातून होतो.

त्‍यामुळे पाणी गाळून तसेच उकळूनच प्यायले पाहिजे, असे तज्ज्ञांनी सांगितले. एक मीटरपेक्षा जास्त लांबीचा हा सुतासारखा जंतू असून आरोग्यासाठी तो धोकादायक आहे. दरम्यान, फोंडा आरोग्याधिकारी डॉ. स्मिता पार्सेकर यांनी या जंतूची अधिक माहिती घेण्यासाठी तज्ज्ञांना पाठवण्यात येणार असल्याचे सांगितले.

तर, कदाचित पावसामुळे हा कृमी वाहून आपल्या घराजवळ आला असावा, असे संदीप पारकर यांनी सांगितले. जोरात आलेल्या पावसामुळे तो वाहूनसुद्धा गेला अशी माहिती देण्यात आली.

हा जंतू पोटात गेल्‍यास काय होते?

गोल कृमी वर्गातील या जंतूमुळे होणाऱ्या रोगाला ‘ड्रॅंक्यूक्यूलस मेडिनेन्सिस’ असे म्हणतात. या कृमीला ‘गिनी वर्म’ या नावाने ओळखले जाते. मराठीत त्याला ‘नारू’ असेही म्हटले जाते. पिण्याच्या पाण्याबरोबर या जंतूची अंडी पोटात गेल्यास पायाला जखम करूनच हा सुतासारखा कृमी जीव बाहेर येतो. एवढे भयानक स्वरूप या रोगाचे आहे.