पणजी : भाजपला पाचपैकी फक्त तीन राज्यात पूर्ण बहुमत मिळालं आहे. मात्र गोव्यात भाजपला लोकांनी स्पष्ट बहुमत दिलेलं नाही. त्यामुळेच त्यांना अपक्ष आणि मगोचा पाठिंबा घ्यावा लागतोय. मात्र आगामी निवडणुकीत भाजपचा अहंकार जनताच संपवून टाकेल असा विश्वास काँग्रेस नेते नाना पटोले यांनी केलं आहे. गोव्यात हार पत्करली असली तरीही गोमंतकीय जनतेने पूर्णपणे भाजपला स्वीकारलं नसल्याचं पटोले म्हणाले आहे.

विधानसभा निवडणुकीत काँग्रेसचा (Congress) सुपडासाफ झाला असला तरीही येत्या निवडणुकांमध्ये काँग्रेसचं केंद्रीय नेतृत्त्व आणखी ताकदीने लढणार आहे. काँग्रेसचं केंद्रीय नेतृत्त्व अजूनही भक्कम आहे आणि याचा फायदा आगामी 2024 च्या लोकसभा निवडणुकीत काँग्रेसला होणार असल्याचं वक्तव्य नाना पटोलेंनी केलं आहे. तसंच महाराष्ट्रातही जनता मुंबईसह अन्य महापालिका निवडणुकांमध्ये भाजपचं (BJP) गर्वहरण करणार असल्याचा दावाही पटोलेंनी केला.

दरम्यान गोवा विधानसभा निवडणुकीत (Goa Election) काँग्रेसला 40 पैकी केवळ 11 जागांवर समाधान मानावं लागलं आहे. गोव्याच्या जनतेने दिलेल्या जनादेशाचा आम्ही सन्मानपूर्वक स्वीकार करतो, असं वक्तव्य काँग्रेसचे ज्येष्ठ नेते पी चिदंबरम यांनी केलं आहे. आम्ही गोव्यात पराभव स्वीकारला आहे. मात्र आम्ही जनतेसाठी काम करत राहू असंही चिदंबरम पुढे म्हणाले आहेत. तर काँग्रेसचे गोवा प्रदेशाध्यक्ष गिरीश चोडणकर यांनीही पराभवाची जबाबदारी स्वीकारत आपलं पद सोडण्याची तयारी दाखवली आहे. पक्षाने प्रदेशाध्यक्षपदी दुसऱ्या नेत्याची नेमणूक करावी, असंही चोडणकर पुढे म्हणाले आहेत.