पणजी: गोव्यात बुधवारपासून आंतराष्ट्रीय चित्रपट महोत्सवाची सुरुवात झाली आहे. या सोहळयाला देश-विदेशातून सिनेकलाकार उपस्थिती लावत आहेत. आज गौहर खान आणि फौजी-2 च्या संपूर्ण टीमने चित्रपट महोत्सवाला उपस्थिती लावली. महत्वाचं म्हणजे आजकाल चर्चेत असणाऱ्या दक्षिणी चित्रपटांमधील नावाजलेला चेहरा, नागा चैतन्य याने देखील वडील नागार्जुन, होणारी बायको शोबिता आणि संपूर्ण परिवारासोबत आंतराष्ट्रीय चित्रपट महोत्सवासाठी आयनॉक्स पणजी येथे रेड कार्पेटवर हजेरी लावली.

लवकरच नागा चैतन्य आणि शोबिता लग्नगाठ बांधणार असल्याच्या बातम्या समोर येत आहेत आणि अशात दोघांनी सोबत गोव्यात चित्रपट महोत्सवाला हजेरी लावल्याने चाहत्यांना आनंद झाला. नागा चैतन्य हा दक्षिण चित्रपट सृष्टीतील एक ओळखीचा चेहरा आहे आणि अनेकांच्या पसंतीस उतरलेल्या सामंथा रूथ प्रभू हीच पूर्व पती आहे.

2017 मध्ये सामंथा आणि नागा चैतन्य यांनी हिंदू आणि ख्रिस्ती पद्धतीने लग्नगाठ बांधली होती आणि केवळ चार वर्षांनंतर दोघांचा संसार मोडला. यानंतर आता लवकरच नागा चैतन्य आणि शोबिता लग्न करणार आहेत. शोबिता तिच्या नाईट मॅनेजर मधल्या अभिनयासाठी ओळखली जाते.

राज्यात फिल्म फेस्टिव्हल तर साखळीत बलून टँट थिएटर

गोव्यात गेल्या काही दिवसांपासून आंतराष्ट्रीय चित्रपट महोत्सवाची बरीच चर्चा सुरु आहे. बुधवारी पणजीतील शामाप्रसाद मुखर्जी मैदानावर आंतराष्ट्रीय चित्रपट महोत्सवाचे उद्घाटन झाले आणि यानंतर आता गुरुवारी (दि. 21 नोव्हेंबर) रोजी आंतरराष्ट्रीय चित्रपट महोत्सवाच्या अनुषंगाने साखळीत साकारण्यात आलेल्या बलून टँट थिएटरचे पद्मिनी फाऊंडेशनच्या अध्यक्षा सुलक्षणा सावंत यांच्या हस्ते उद्घाटन करण्यात आले.