मडगाव: मुंगुल गॅंगवॉर प्रकरणी सध्या पोलिसांना शरण आलेल्या गँगस्टर  वेली डिकोस्टाने गॅंगवारच्या घटनेनंतर ६० लाखांची आलिशान कार खरेदी केली होती.

तसेच त्याचा साथीदार अमोघ यानेही दहाचाकी  ट्रक खरेदी केला होता, असे पोलिस तपासणीत आढळून आले आहे. त्यामुळे हे गौडबंगाल नेमके काय आहे, याचा तपास फातोर्डा पोलिस करीत आहेत.

वेली आणि अमोघने खरेदी केलेली ही दोन्ही वाहने आता पोलिसांच्या रडारवर आली आहेत. पोलिसांनी याबाबत कमालीची गुप्तता बाळगली आहे.  मुंगूल  येथे १२ ऑगस्ट रोजी झालेले गॅंगवॉर हे गुन्हेगारी विश्वात वर्चस्व ठेवण्यासाठी वेली  व वॉल्टर यांच्या गँगमध्ये झाले होते.

यात कुख्यात गँगस्टर लॉरेन्स बिष्णोई यांचेही नाव समोर आल्याने या प्रकरणाचे गूढ वाढले होते.  वेलीकडे असलेली आलिशान कार ही  काणकोणच्या एका व्यक्तीच्या नावावर असल्याची माहितीही सूत्रांकडून मिळाली आहे. त्यामुळे तो सध्या पोलिसांच्या रडारवर आहे.