डिचोली: मुळगावमधील खाणप्रश्नी रद्द करण्यात आलेली संयुक्त बैठक आता उद्या (ता. १८) घेण्यात येणार आहे. तशी नोटीसही उपजिल्हाधिकारी कार्यालयाकडून संबंधितांना पाठविण्यात आली आहे. उद्याच्या बैठकीकडे मुळगाववासीयांचे लक्ष लागून राहिले आहे. उद्या (मंगळवारी) पणजी येथे उत्तर गोवा जिल्हाधिकारी कार्यालयात सायंकाळी ५ वा. ही बैठक होणार आहे, अशी माहिती मिळाली आहे.

केंद्रीयमंत्री जी. किशन रेड्डी हे गोव्यात आल्याने गेल्या गुरुवारी (ता. १३) रोजी बोलाविण्यात आलेली बैठक अखेरच्या क्षणी रद्द करण्यात आली होती.

दोन महिन्यापूर्वी मुळगाव येथे खाण प्रश्न तापला होता. मुळगावमधील लोकांच्या तीव्र विरोधामुळे गेल्या महिन्याहून अधिक काळापासून मुळगावमधील ‘वेदांता’ची खाण बंद आहे.

मध्यंतरी डिचोलीचे उपजिल्हाधिकारी भीमनाथ खोर्जुवेकर यांच्या निर्देशानुसार मुळगाव खाणीची संयुक्त पाहणी करण्यात आली होती. पावसाळापूर्व प्रतिबंधात्मक उपाययोजना करण्याचे निर्देशही उपजिल्हाधिकाऱ्यांनी खाण कंपनीला दिले होते. दरम्यान, मुळगावमधील लोकांनी पुढे केलेल्या काही मागण्या कंपनीने विचारात घेतल्या असून मुळगाव खाणप्रश्नी सुवर्णमध्य निघण्याची आशा वाढली आहे.

बैठकीत अनेकांचा सहभाग

मुळगाव पंचायतीसह, देवस्थान, कोमुनिदाद, नागरिक कृती समिती, जैवविविधता समिती तसेच प्रदूषण नियंत्रण मंडळ ‘वेदांता’ व्यवस्थापन आणि अन्य संबंधित घटक यांच्याबरोबर उद्याची संयुक्त बैठक होणार आहे, अशी माहिती मिळाली आहे.