फोंडा: भोम येथील रस्त्याचा विषय आपण केंद्रीय रस्ते आणि महामार्गमंत्री नितीन गडकरी यांच्याकडे नेणार असल्याचे दक्षिण गोव्यातील काँग्रेसचे खासदार कॅप्टन विरियातो फर्नांडिस यांनी सांगितले. भोम येथील ग्रामस्थांची भेट घेतल्यानंतर त्यांनी गावातून जाणारा रस्ता आणि लोकांचा विरोध यासंबंधीच्या भावना जाणून घेतल्या. गरज भासल्यास हा विषय आपण लोकसभेतही उपस्थित करू, अशी ग्वाही त्‍यांनी दिली.

खासदार विरियातो यांनी आज रविवारी भोम गावाला भेट दिली. सुरूवातीला त्यांनी येथील मंदिरात जाऊन श्रींचे दर्शन घेतले. यावेळी काँग्रेसचे प्रदेशाध्यक्ष अमित पाटकर, आम आदमी पक्षाचे फोंड्यातील नेते ॲड. सुरेल तिळवे, गाकुवेधचे रामकृष्ण जल्मी, ग्रामस्थांचे प्रतिनिधी संजय नाईक व ग्रामस्थ उपस्थित होते.

यावेळी ग्रामस्थांनी सांगितले की, आम्हाला गावातून चौपदरी रस्ता नको, बगलमार्ग हवा. गाव नष्ट करून आणि येथील प्राचीन मंदिरांचे अस्तित्व धोक्यात आणून आम्हाला विकास नकोच आहे.त्यासाठी बगलमार्ग उभारा अशी मागणी ग्रामस्थांनी केली.

कॅ. विरियातो फर्नांडिस (खासदार, दक्षिण गोवा)

केंद्रीय मंत्री नितीन गडकरी हे भाजपचे खासदार असले तरी ते एक चांगले माणूस आहेत. लोकांच्या भावनांचा त्यांना आदर आहे आणि लोकांना नको असेल तर भोम गावातून चौपदरी रस्ता निश्‍चितच होणार नाही. त्यासाठी गरज भासल्यास गडकरी यांच्या भेटीवेळी भोम गावातील शिष्टमंडळही नेऊ. तेथे हा विषय न सुटल्यास लोकसभेत आवाज उठवणार.