पणजी: फोंडा तालुक्यातील म्हार्दोळ परिसरात शनिवारी (7 जून) सकाळी एक दुचाकी अपघातात आई व तिची मुलगी गंभीर जखमी झाल्या. बगल रस्त्यावरून जात असताना अचानक समोर आलेल्या भटक्या कुत्र्यांमुळे स्कुटरवरील नियंत्रण सुटले आणि हा अपघात झाला.

या अपघातात दोघींनाही दुखापत झाली असून त्यांना तातडीनं फोंडा उपजिल्हा इस्पितळात दाखल करण्यात आले आहे. सध्या त्यांच्यावर उपचार सुरू आहेत.ही घटना शनिवारी (7 जून) दुपारच्या सुमारास घडली.

या अपघातानंतर स्थानिक नागरिकांनी तातडीने मदत करत दोघींना रुग्णालयात हलवले. प्राथमिक माहितीनुसार, भटक्या कुत्र्यांचा सुळसुळाट हा प्रकार वाढत असून त्यामुळे अपघातांची शक्यता अधिक वाढली आहे.

राज्यातील अनेक परिसरात भटक्या कुत्र्यांची वाढती संख्या लक्षात घेता तातडीने योग्य उपाययोजना कराव्यात, अन्यथा भविष्यात आणखी गंभीर अपघात होण्याची शक्यता आहे.

या घटनेनंतर स्थानिक नागरिकांमध्ये भीतीचं वातावरण पसरलं आहे. राज्यातील शहरात दिवसेंदिवस भटक्या कुत्र्यांची समस्या वाढत असून, अशा घटना वारंवार घडत आहेत. त्यामुळे प्रशासनाने या समस्येकडे गांभीर्यानं लक्ष देण्याची मागणी होत आहे.