salcete : सासष्टी तालुक्यात असलेल्या काही नागरी पुरवठा खात्याच्या रेशन दुकानात धान्याचा तुटवडा जाणवत आहे. गणेश चतुर्थीचा उत्सव अवघ्या काही दिवसांवर येऊन ठेपला असल्याने अनेकांना फराळ करण्यासाठी या धान्याची आवश्‍यकता असते, हे धान्य लवकरात लवकर उपलब्ध करून देण्यात यावे, अशी मागणी होत आहे.

सासष्टीतील लोटली, नावेली ,राय येथील काही रेशन दुकानांवरील धान्यसाठा संपला आहे. काही दुकानदारांनी रेशन दुकानांची शटर्स अर्धवट ओढून रेशनची विचारणा करण्यास आलेल्यांना धान्य आले नसल्याचे सांगत आहेत.

नागरी पुरवठा खात्याचे सासष्टी तालुका निरीक्षक रामकृष्ण साळगावकर यांनी मंगळवारपर्यंत धान्य दुकानांना धान्य पुरवठा केला जाईल, असे सांगितले आहे. या माहितीनुसार दुकानदारांकडूनही ग्राहकांना मंगळवारनंतर धान्य उपलब्ध होईल,असे सांगितले जात आहे. सप्टेंबरचा धान्यसाठा खात्याकडून आलेला नाही.