Morpirla Parents Protest : सतत आठ वर्षे दहावीचा शंभर टक्के निकाल देणाऱ्या मोरपिर्ला केपे येथील सरकारी विद्यालय व प्राथमिक शाळेची अवस्था बिकट झाली आहे. गेल्या अनेक महिन्यांपासून या विद्यालयाची दुरुस्ती करण्याच्या मागणीकडे विद्यालाय प्रशासनाकडून दुर्लक्ष झाल्याने पालकांनी संताप व्यक्त केला आहे. त्यामुळे पालकांनी उद्यापासून आपल्या पाल्यांना शाळेत न पाठविण्याचा निर्णय घेतला आहे.

मोरपिर्ला गावातील सरकारी प्राथमिक व माध्यमिक विद्यालयाच्या इमारतीची परिस्थिती अत्यंत बिकट झाल्याने शाळेवर बहिष्कार घालण्याचा निश्‍चय पालकांनी केल्याचे पंच सदस्य प्रकाश वेळीप यांनी सांगितले. रोहिदास गावकर म्हणाले, की मुख्यमंत्री केपे येथे आल्यावर शाळेची दुरवस्था त्यांच्या निदर्शनास आणून दिली होती. त्यांनी अधिकाऱ्यांना निर्देशही दिले होते. केपे येथील साहाय्यक शिक्षण संचालक कार्यालयात जाऊन त्यांना सुद्धा याची जाणीव करून दिली होती, पणपुढे त्याचे काय झाले, याबाबत कोणीही उत्तर देत नाही.

सरकारला भावनिक आवाहन

मोरपिर्ला गाव केपे मतदारसंघातील ग्रामीण भागात येते. या विद्यालयात शिकणारी मुले गरीब कुटुंबातील आहे. त्यांना शहरात जाऊन शिक्षण घेता येत नाही. त्यांच्या पालकांना आर्थिकदृष्ट्या ते परवडत नाही. याच विद्यालयावर गाव आणि परिसरातील मुलांचे भवितव्य अवलंबून आहे. त्यामुळे सरकार आणि प्रशासनाने त्यांच्या जीविताशी खेळू नये, असे भावनिक आवाहन पालकांनी केले आहे.

मुख्यमंत्री डॉ. प्रमोद सावंत यांनी दिलेले शाळा दुरुस्तीचे आश्‍वासन हवेतच विरले आहे. शाळेची सध्याची दुरवस्था पाहता कधीही छप्पर कोसळून विद्यार्थ्यांवर पडू शकते. अशा परिस्थितीत पालक आपल्या मुलांना शाळेत कसे पाठवणार? संबंधित खात्यांच्या अधिकाऱ्यांना वेळोवेळी सांगूनसुद्धा त्यांनी या गंभीर गोष्टीकडे दुर्लक्ष केले. आपल्या पाल्यांच्या सुरक्षेसाठीच पालकांनी मुलांना शाळेत न पाठिवण्याचा निर्णय घेतला आहे.

प्रकाश वेळीप, पंच सदस्य