वास्को: विधानसभेत उभे राहून ‘मुरगावात पाण्याचा प्रश्न भेडसावत आहे’. ‘जनता दहशतीखाली राहत आहे,’ अशी विधाने करून स्वतःची खिल्ली उडवणारी व्यक्ती मुरगावात अपघाती आमदार बनली आहे, अशी टीका मुरगाव भाजप मंडळातर्फे आमदार संकल्प आमोणकर यांच्या विधानावर करण्यात आली. मुरगावात मिठाई वाटून विद्यमान आमदार आपला विजय साजरा करीत असले तरी माजी आमदार मिलिंद नाईक यांनी प्रत्येक घरात नोकऱ्यांबरोबर यशस्वीरित्या विकास साधला आहे,अशी माहिती राज्य भाजप कार्यकारिणी सदस्य जयंत जाधव यांनी दिली.

वास्कोत आयोजित पत्रकार परिषदेत मुरगाव भाजप मंडळाच्या पदाधिकाऱ्यांनी वरील माहिती दिली. यावेळी मुरगाव भाजप गटाध्यक्ष संजय सातार्डेकर, मुरगाव नगरपालिकेचे नगराध्यक्ष दामोदर कासकर, नगरसेवक दामू नाईक, प्रजय मयेकर, कृणाली मांद्रेकर, रामचंद्र कामत,लिओ रॉड्रीगीस,मंजुषा पिळर्णकर,दया नाईक उपस्थित होते.

जाधव म्हणाले,की मुरगावातील बोगदा, रूमडावाडा,जेटी भाग डोंगराळ असल्याने तेथे पावसाळ्यात धोका निर्माण होतो. यासाठी गेली अनेक वर्षे मुरगाव पालिका त्यांना नोटीस बजावत आहे. उगाच कुठलेही आरोप आमदारांनी पालिकेवर करू नयेत. पावसाळ्यात दुर्घटना घडल्यास आमदार स्वतः जनतेची काळजी घेणार, तर त्यांनी असे लिहून द्यावे, असे दामोदर कासकर यांनी केले.