Mopa International Airport

पेडणे: मोपा आंतरराष्ट्रीय विमानतळावर रोजगाराबाबत स्थानिकांना डावलण्यात येत अजून नुकत्याच धावपट्टीवर कचरा गोळा करण्यासाठी आणण्यात आलेल्या गाडीसाठीही परप्रांतीयांची निवड करण्यात आली आहे. त्यामुळे आता सत्ताधारी पक्षाला पाठिंबा देणाऱ्या ग्रामपंचायतींनी सात दिवसांच्या आत आवाज न उठवल्यास आम्ही ग्रामपंचायत व सरकाराविरुध्द आंदोलन सुरू करणार आहोत, असा इशारा मोपा पिडीत जनसंघटनेतर्फे पेडणे येथे पत्रकार परिषदेत दिला.

या पत्रकार परिषदेला भास्कर नारुलकर, उदय महाले, संदीप कांबळी, महेश तुळसकर व रमाकांत अमेरकर उपस्थित होते. यावेळी भास्कर नारुलकर म्हणाले. की, मोपा आंतरराष्ट्रीय विमानतळ धावपट्टीवरील कचरा काढण्यासाठी तीन परप्रांतीय उमेदवारांची निवड केली आहे. त्यात स्थानिकांना डावलण्यात आले आहे.

मुख्यमंत्री डॉ. प्रमोद सावंत हे अनेकदा मोपा विमानतळावर ९९ टक्के रोजगार हा पेडणे तालुक्यातील लोकांना मिळणार असे सांगतात, पण तसे झालेले नाही. त्यामुळे सरकारने मोपा विमानतळावर किती पेडणेकरांना नोकऱ्या दिल्या याची चौकशी करावी. यावेळी संदीप कांबळी, शेतकरी रमाकांत अमेरकर यांनीही आपली कैफीयत मांडली.

...तर सरपंचांनी राजीनामे द्यावे

उदय महाले म्हणाले, की विमानतळाच्या नावावर कवडीमोलाने बेकायदेशीररित्या आमच्या जमिनी बळकावल्या, पण आम्हाला नोकऱ्या किंवा व्यवसाय करू देत

नाहीत. जर जीएमआरआय कंपनी स्थानिक लोकांचा हक्क डावलत असेल, तर त्यांना दिलेले सगळे ना हरकत दाखले मागे घ्यावे. सत्ताधारी पक्षात असूनही विविध पंचायतींच्या सरपंचांना काहीच करता येत नसेल, तर त्यांनी राजीनामे द्यावे.