पणजी: नैऋत्य मोसमी वाऱ्यांच्या (मॉन्सून) परतीच्या प्रवासाला चांगलाच वेग आला आहे. देशातील काही भागांबरोबरच गोव्यातून मॉन्सूने माघार घेतल्याचे हवामान विभागाने सोमवारी (१३ ऑक्टोबर) जाहीर केले. परतीसाठी पोषक हवामान असल्याने लवकरच मॉन्सून देशातून निरोप घेण्याची शक्यता आहे. यावर्षी नेहमीपेक्षा लवकर आगमण झालेल्या पावसाने निरोप देखील लवकर घेतला आहे.

यावर्षी गोव्यात २५ मे रोजी पावसाचे आगमण झाले होते. नेहमीपेक्षा ११ दिवस अगोदर पावसाने हजेरी लवाली होती. गोव्यात ३० सप्टेंबर आणि १० ऑक्टोबर रोजी मुसळधार पावसाची नोंद झाली. या दोन दिवसांच्या पावसाने सर्वत्र पाणीच पाणी झाले होते. 

दरम्यान, राज्यात ऑक्टोबर ते डिसेंबर या कालावधीत वादळी वाऱ्यासह हवामानात किरकोळ बदल होण्याची शक्यता असते. हवामान खात्याने राज्यात १४ ते १६ ऑक्टोबर याकालावधीत यलो अलर्ट जारी केला असून, वादळी वाऱ्यासह वीजांचा गडगडाट होण्याची शक्यता व्यक्त केली आहे.

सोमवारी राज्यात निरभ्र आकाश होते, वातावरणातील आद्रता ते दिवसा कडक ऊन अनुभवायला मिळाले.