Goa Government: राज्यातील राष्ट्रीय क्रीडा स्पर्धेमुळे सरकारने शालेय दिवाळीच्या सुट्टीत बदल केला आहे. या बदलामुळे तुलसीविवाह सणादिवशी असलेली सुट्टी रद्द झाली आहे. दिवाळीपेक्षा तुलसीविवाहासाठी लोकांना तयारी करावी लागते.

त्यामुळे सरकारने केलेल्या सुट्टीच्या बदलाबाबत पुनर्विचार करण्याची मागणी गोवा फॉरवर्ड पक्षाचे सरचिटणीस मोहनदास लोलयेकर यांनी केली.

यावर्षी दिवाळीची सुट्टी शिक्षण खात्याने ८ ते २६ नोव्हेंबर यादरम्यान निश्‍चित केली होती. मात्र, सरकारने राष्ट्रीय क्रीडा स्पर्धांमुळे त्यामध्ये मोठा बदल केल्याने शालेय शिक्षक व विद्यार्थ्यांत नाराजी आहे. या स्पर्धा होणार असल्याचे सरकारला अनेक महिन्यांपासून माहीत होते, त्यामुळे त्यांनी यापूर्वीच त्यात बदल करायला हवा होता.

काही शालेय शिक्षकांनी सुट्टीच्या काळातील बाहेरगावी जाण्याचा कार्यक्रम काही महिन्यांपूर्वीच आरक्षण करून निश्‍चित केलेला होता. मात्र, सरकारच्या या बदलामुळे शिक्षकांनी सुट्टीच्या काळात केलेल्या नियोजनावर पूर्णपणे पाणी फेरले आहे, असे लोलयेकर म्हणाले.

शिक्षकांना दिवाळी व मे महिन्याच्या सुट्टीत विरंगुळ्यासाठी गोव्याबाहेर पडता येते. मात्र सरकारने ८ ते २६ नोव्हेंबर ऐवजी आता २५ ऑक्टोबर ते १८ नोव्हेंबर अशी दिवाळीची सुट्टी निश्‍चित केल्याने अनेक शिक्षकांनी केलेले नियोजन रद्द करावे लागणार आहे, असे लालयेकर यांनी सांगितले.