पर्यटकांचे मोबाईल चोरणाऱ्या दोघा चोरट्यांना अटक करण्यात कळंगुट पोलिसांना यश आले आहे. या कारवाईत झारखंड, आसाम येथील संशयितांकडून 1 लाख 30 हजार रुपयांचे 11 मोबाईल फोन जप्त करण्यात आले आहेत. याप्रकरणी गुन्हा दाखल केला असून कळंगुट पोलिस पुढील तपास करीत आहेत.

याबाबत पोलिसांनी दिलेली माहिती अशी की, पोलिसांनी बागा कळंगुट परिसरातून दोन संशयित व्यक्तींना पकडले. त्यांची अधिक चौकशी केली असता संशय आल्याने त्यांची झाडाझडती घेण्यात आली. यावेळी संशयितांकडे विविध ब्रँडचे 11 मोबाईल फोन सापडले. पोलिसांनी दिलेल्या माहितीनुसार या मोबाईल फोन्सची बाजारातील मूल्य 1 लाख 30 हजार रुपये एवढे आहे.

संशयितांची चौकशी केली असता संशयितांनी बागा समुद्रकिना-यावरून सदर फोन चोरी केल्याचे उघड केले. याप्रकरणी कळंगुट पोलिसांनी सूरज रविदास (27, रा. बार्देझ, मूळ, झारखंड) व सनी हुसैन दुल (29, मूळ. आसाम) या संशयितांना अटक केली आहे. ही कारवाई हेड कॉन्स्टेबल विद्यानंद आमोणकर, पोलिस कॉन्स्टेबल अमीर गरड, प्रवीण चोडणकर यांनी केली.

प्रकरणाचा पुढील तपास कळंगुट पोलीस स्टेशनचे पीएसआय रमेश हरिजन, पीआय परेश जी नाईक आणि एसडीपीओ पर्वरी विश्वेश व्ही कर्पे यांच्या देखरेखीखाली सुरू आहे.