Vijai Sardesai: मडगाव ही राज्याची व्यापारी राजधानी आहे. मडगावमध्ये आधुनिक आणि बहुउद्देशीय बसस्थानकाची गरज आहे, अशी मागणी गोवा फॉरवर्ड पक्षाचे अध्यक्ष आणि फातोर्डाचे आमदार विजय सरदेसाई यांनी केली. तसेच सोनसडो येथील कचरा प्लांट घनकचरा व्यवस्थापन प्राधिकरणाकडे सोपवण्याबाबत निर्णय झाला, त्याची सद्यस्थिती स्पष्ट करा, असेही सरदेसाई यांनी म्हटले आहे.

बुधवारी आमदार सरदेसाई यांनी पत्रकार परिषदेतून विविध मुद्यांना हात घालत सरकारने त्यावर स्पष्टीकरण देण्याची मागणी केली.

मंगळवारच्या मुख्यमंत्र्यांच्या भाषणाचा संदर्भ देत सरदेसाई म्हणाले की, केंद्र सरकारने गोव्याला 30,000 कोटी रुपयांची तरतूद केली आहे. भरीव निधीचा उल्लेख असूनही मडगाव बसस्थानकाचा कोणताही विकास झालेला नाही.

मडगाव ही राज्याची व्यापारी राजधानी आहे. माजी मुख्यमंत्री दिगंबर कामत यांच्या विचारांशी सुसंगत आधुनिक आणि बहुउद्देशीय बसस्थानकाची गरज मडगावला आहे.

सोनसडो येथे इनर्ट कचऱ्याचा डोंगर झाला आहे. या प्लांटच्या भवितव्यावर लक्ष ठेवण्यासाठी नेमलेल्या उच्चाधिकार समितीची तातडीची बैठक बोलवा. हा प्लांट घनकचरा व्यवस्थापन प्राधिकरणाकडे सोपवण्याचा निर्णय यापूर्वी झाला आहे. त्याची सद्यस्थिती स्पष्ट करा.

फातोर्डा येथील दक्षिण जिल्हा रुग्णालयाचे खासगी वैद्यकीय महाविद्यालयात रूपांतर करण्याच्या प्रस्तावालाही सरदेसाई यांनी विरोध दर्शविला. लोकांनी वैद्यकीय महाविद्यालयाची मागणी केली नसून त्याऐवजी पूर्ण सुसज्ज रुग्णालय हवे होते, याकडे त्यांनी लक्ष वेधले.

गोव्यातील विद्यार्थी अशा संस्थांच्या विरोधात असल्याचे अधोरेखित करून सरदेसाई यांनी खासगी कॅपिटेशन वैद्यकीय महाविद्यालयांबाबत नाराजी व्यक्त केली. दिगंबर कामत यांनी प्रस्तावित वैद्यकीय महाविद्यालयाला पाठिंबा आहे का, हे स्पष्ट करावे.

दक्षिण गोवा जिल्हा रूग्णालयात एम्स उभारण्यासाठी सरकारने प्राधान्याने काम करावे, असेही ते म्हणाले.

वारंवार वीज खंडित होण्याच्या त्रासापासून लोकांना वाचवण्यासाठी फातोर्डामध्ये वीज उपकेंद्राची गरज आहे. बोर्डा येथे रिंगरोडची गरज आहे. बहुउद्देशीय महाविद्यालयाच्या प्रकल्पाला गती द्यावी, असेही ते म्हणाले.