Mahadayi Water Dispute: म्हादई प्रश्नी मुख्यमंत्री डॉ. प्रमोद सावंत यांनी गोव्यातील इतर मंत्र्यांच्या शिष्टिमंडळासोबत केंद्रीय गृहमंत्री अमित शाह यांची बुधवारी भेट घेतली. दरम्यान, यावरून आम आदमी पक्षाचे बाणावलीचे आमदार वेन्झी व्हीएगस (Venzy Viegas) यांनी राज्य सरकारवर टीका केली आहे.

व्हेन्झी व्हिएगस यांनी म्हटले आहे की, गोवा शिष्टमंडळाची दिल्ली भेट म्हणजे म्हादई प्रश्नावर राज्य सरकारने पुन्हा गोवेकरांच्या डोळ्यात केलेली धुळफेक आहे. म्हादई प्रश्नी गोव्याचा वाद कर्नाटकसोबत आहे. हा आंतरराज्य प्रश्न आहे. त्यामुळेच हा वाद इंटर स्टेट रिव्हर वॉटर डिस्प्युट अॅक्ट 1956 अंतर्गतच सोडवता येणार आहे. त्यामुळे यात केंद्रीय गृह मंत्रालयाचा संबंधच काय? त्यामुळे म्हादईच्या मुद्यावर केंद्रीय गृहमंत्री अमित शाह किंवा केंद्रीय जलस्त्रोत मंत्री गजेंद्रसिंह शेखावत हे नेते तसेच केंद्रीय पर्यावरण मंत्रालय काहीही करू शकत नाही.

मुख्यमंत्री डॉ. प्रमोद सावंत यांनी शिष्टमंडळासह बुधवारी रात्री केंद्रीय गृहमंत्री अमित शाह यांची भेट घेतली. म्हादईविषयी गोव्याची बाजू शिष्टमंडळाने सविस्तरपणे अमित शाह यांच्यासमोर मांडली. म्हादई प्रश्नात लक्ष घालू, असे आश्वासन अमित शाह यांनी दिल्याचे सांगण्यात आले होते. कळसा आणि भांडुरा या म्हादईच्या उपनद्यांचे पाणी वळविण्यासाठी केंद्रीय जलआयोगाने कर्नाटकाच्या सुधारित सविस्तर प्रकल्प आराखड्याला (डीपीआर) दिलेली मंजुरी रद्द करावी, तसेच म्हादई पाणी प्राधिकरण स्थापन करावे अशा मागण्यांचे निवेदन यावेळी शिष्टमंडळाच्या वतीने अमित शाह यांना देण्यात आले होते.