कळंगुट: गोव्यातील कळंगुट भागात स्पाच्या नावाखाली चालणाऱ्या वेश्याव्यवसायावर आता प्रशासनाने कडक भूमिका घेण्याचे संकेत दिले आहेत. कळंगुटचे आमदार मायकल लोबो यांनी यावर तीव्र चिंता व्यक्त केली असून, अशा अवैध धंद्यांवर १०० टक्के कारवाई केली जाईल असे त्यांनी स्पष्ट केले आहे. लोबो यांनी टोट अर्थात बेकायदेशीर मार्गदर्शकांना या गैरकृत्यांसाठी जबाबदार धरले असून, त्यांच्यावर प्रथम कारवाई करण्याची गरज असल्याचे म्हटले आहे.

'स्पा'च्या नावाखाली चालणाऱ्या गैरकृत्यांवर लक्ष

आमदार मायकल लोबो यांनी नुकतेच एका निवेदनात सांगितले की, "आम्ही योग्य पद्धतीने चालणाऱ्या स्पाच्या विरोधात नाही, पण वेश्याव्यवसायासाठी जे स्पा केवळ नावापुरते वापरले जातात, त्यांना तातडीने थांबवले पाहिजे." हे अवैध धंदे थांबवण्यासाठी प्रदूषण नियंत्रण मंडळ, ग्रामपंचायत, पोलीस आणि स्वयंसेवी संस्था यांच्या समन्वयाने १०० टक्केकारवाई केली जाईल, यात कोणतीही शंका नाही असे लोबो यांनी ठामपणे सांगितले आहे.

बागा येथील 'स्पा'वर तात्काळ कारवाई

लोबो यांनी काही दिवसांपूर्वी बागा येथील एका विशिष्ट स्पाबद्दल कळंगुट पोलीस निरीक्षकांशी संपर्क साधला होता. त्यांना मिळालेल्या माहितीनुसार, त्या स्पाच्या आत बेकायदेशीर कामं सुरु होती. या माहितीच्या आधारे पोलिसांनी तात्काळ कारवाई केली.

त्या ठिकाणी ग्राहकांशी वाटाघाटी करताना आढळलेल्या व्यक्तींविरुद्ध पोलिसांनी त्वरित पाऊल उचलले.

'टोट'वर प्रथम कारवाई गरजेची

आमदार लोबो यांनी या गैरकृत्यांमध्ये बेकायदेशीर मार्गदर्शक म्हणजेच 'टोट' यांचा सहभाग असल्याचे अधोरेखित केले. "बेकायदेशीर मार्गदर्शक अनेकदा अशा कारवायांमध्ये खोलवर गुंतलेले असतात. या 'टोट'ना सर्वप्रथम थांबवणे आवश्यक आहे" असे लोबो यांनी म्हटले आहे.

अशा प्रकारच्या सर्व अवैध कृत्यांची पोलिसांनी कसून चौकशी करून कठोर कारवाई करावी, अशी मागणीही त्यांनी केली आहे. कळंगुटसारख्या पर्यटनस्थळी अशा बेकायदेशीर धंद्यांमुळे गोव्याच्या प्रतिमेला धोका निर्माण होतो. त्यामुळे, लोबो यांच्या या भूमिकेला स्थानिकांकडून मोठ्या प्रमाणात पाठिंबा मिळण्याची शक्यता आहे.