MLA Delilah Lobo: शिवोली मतदारसंघातील पाणी समस्या कायमस्वरूपी सोडविण्यासाठी आसगाव येथील सोनारखिंड येथे 5.6 एमएलडी क्षमतेचे जलशुद्धीकरण केंद्र तर आसगाव येथे 300 घनमीटरची नवीन पाण्याची टाकी बांधणार आहे.

त्यामुळे मतदारसंघातील पाण्याची समस्या कायमची दूर होईल, असा विश्वास आमदार डिलायला लोबो यांनी व्यक्त केला. शिवोली मार्केटमध्ये नूतनीकरण केलेल्या टॉयलेट ब्लॉकच्या उद्घाटनानंतर त्या पत्रकारांशी बोलत होत्या.

आमदार लोबो म्हणाल्या की, आसगाव येथील सध्याची पाण्याची टाकी 150 घनमीटरची आहे. तिलाही गळती लागली आहे. निवडणुकीच्या प्रचारादरम्यान स्थानिकांनी टॉयलेट ब्लॉकची आवश्यकता व्यक्त केली होती. याचा समावेश जाहीरनाम्यात देखील केला होता.

आज आम्ही मार्केटमध्ये नूतनीकरण केलेल्या टॉयलेट ब्लॉकचे उद्घाटन केले आहे. शौचालयाची देखभाल पंचायत करेल आणि ही सेवा मोफत दिली जाईल.

त्या म्हणाल्या, शिवोलीमध्ये ड्रग्ज तस्करीबाबत लोबो म्हणाल्या की, ड्रग्ज तस्करी हा प्रत्येकासाठीच चिंतेचा विषय आहे आणि केवळ पंचायत किंवा आमदारच नव्हे तर प्रत्येकाची जबाबदारी आहे की त्यांनी सतर्क राहून तरुण या व्यसनापासून सुरक्षित राहतील, याची काळजी घ्यावी.