45 फूट खोल तसेच 20 फूट पाण्याने भरलेल्या विहिरीत पडलेल्या 14 वर्षीय अल्पवयीन मुलीला म्हापसा अग्निशमन दलाने शनिवारी (ता.२६) सुखरूप बाहेर काढून जीवदान दिले. ही मुलगी मूळची उत्तर प्रदेशमधील असून ती धुळेरमध्ये आपल्या आईवडिलांसोबत भाड्याच्या खोलीत राहते.

म्हापसा अग्निशमन दलाने दिलेल्या माहितीनुसार, ही घटना शनिवारी (ता.२६) सायंकाळी ५.१५ वा.च्या सुमारास घडली. धुळेर येथे गोवा बागायतदारजवळील एका घरामागील विहिरीत मुलगी पडल्याची माहिती शेजाऱ्यांनी पणजी अग्निशमन कंट्रोल रुमला दिली. तेथून म्हापसा अग्निशमन दलास कळविण्यात आले.

त्यानुसार, दलाचे जवान तातडीने घटनास्थळी पोहोचले व त्यांनी विहिरीत पडलेल्या मुलीला लाईफ जॅकेट व दोरखंड टाकला. त्यापूर्वी ही मुलगी विहिरीत बाजूला असलेल्या कोपऱ्यामध्ये उभी राहिली होती.

ही मुलगी विहिरीत नक्की कशी पडली हे समजू शकले नाही. विशेष म्हणजे या विहिराला कठडा आहे.

तातडीने बचावकार्य : म्हापसा अग्निशमन दलाचे प्रमुख श्रीकृष्ण पर्रीकर यांच्या मार्गदर्शनाखाली, फायर फायटर प्रवीण गावकर यांनी या २० फूट पाण्याने भरलेल्या या विहिरीत उतरून या मुलीला सेफ्टी बेल्ट घातला. त्यानंतर, इतर जवानांनी त्या मुलीस ओढून विहिरीबाहेर काढून तिला प्रथमोपचार दिला. या बचावकार्यात सबऑफिसर ज्ञानेश्वर सावंत, विश्वनाथ कोरगावकर, विष्णू गावस, नितीन चोडणकर, भिकाजी काळोजी, साईदत्त आरोलकर, चंद्रकांत नाईक यांनी भाग घेतला.