म्हापसा : पर्वरीतील एका सहा वर्षीय बालिकेवर लैंगिक अत्याचार केल्याचा आरोप असलेला अल्लाबक्ष सय्यदाबादे ऊर्फ बक्षी (४६) याच्‍या घरावर बुधवारी स्थानिक पंचायतीने नोटीस चिकटवली. या नोटिशीनुसार, त्‍या कुटुंबाला सात दिवसांत घर खाली करावे लागणार आहे. दरम्‍यान, तत्‍पूर्वीच संशयिताच्‍या पत्‍नीने आपल्‍या १६ वर्षीय मुलीला घेऊन नातेवाईकांचे घर गाठले आहे.

मुलांना शाळेत ने-आण करणाऱ्या व्‍हॅनवर अल्लाबक्ष सय्यदाबादे हा चालक म्‍हणून काम करतो. पर्वरी पोलिसांनी त्‍याला अटक केली आहे. हा किळसवाणा प्रकार उघडकीस आल्यानंतर काल मंगळवारी रात्री स्थानिकांनी संशयिताच्या घराबाहेर जमाव केला. तसेच त्‍याच्‍या कुटुंबाला गावात राहण्यास तीव्र आक्षेप घेतला.

वातावरण स्‍फोटक बनले. याची दखल घेऊन स्‍थानिक पंचायतीने संशयिताच्‍या घरावर नोटीस चिकटवली. त्‍यानुसार ‘२० कलमी कार्यक्रम’ परिसरातील या कुटुंबाला सात दिवसांत घर खाली करावे लागणार आहे.सध्या संशयित अल्लाबक्ष सय्यदाबादे हा चार दिवसांच्या पोलिस कोठडीत आहे.

अन्‍यथा कठोर कारवाई

पंचायतीने नोटिशीत म्हटले आहे की, या प्रकरणी पंचायतीला स्थानिकांकडून तक्रार प्राप्त झाली आहे. त्‍यामुळे सामान्य जनतेमध्ये भीती, अशांतता व असुरक्षितता निर्माण झाली आहे.

म्हणूनच तुमच्या निवासस्थानाच्या परिसरात कोणतीही अनुचित घटना टाळण्यासाठी खबरदारीचा उपाय म्हणून तुम्हाला परिसर खाली करण्याचे निर्देश देण्यात येत आहेत. ही नोटीस मिळाल्याच्या तारखेपासून सात दिवसांच्या आत हा परिसर खाली करावा लागेल अन्यथा तुमच्या कुटुंबाविरुद्ध कठोर कारवाई केली जाईल.