पणजी: अवघ्या काही दिवसांवर येऊन ठेपलेल्या इफ्फीची तयारी जवळपास पूर्ण झाली आहे. राज्यात यंदा 55 वा आंतरराष्ट्रीय चित्रपट महोत्सव साजरा केला जाईल. देश विदेशातील चित्रपटप्रेमींसाठी हा सोहळा महत्वाचा असतो आणि दरवर्षी मोठ्या संख्येत लोकं गोव्याला भेट देतात. माहिती आणि प्रसारण विभागाचे राज्यमंत्री डॉ. एल. मुरुगन यांनी 20 ते 28 नोव्हेंबर या काळात होणाऱ्या इफ्फीच्या तयारीचा आढावा घेतला.

डॉ. एल. मुरुगन यांच्या मते आंतराष्ट्रीय स्थरावर होणाऱ्या या चित्रपट सोहळ्याच्या माध्यमातून गोव्याची सांस्कृतिक विविधता जागतिक पातळीवर प्रदर्शित केली गेली पाहिजे, यासोबतच त्यांनी चित्रपट महोत्सवाच्या कामात सामील असलेल्या सर्वांना मन लावून काम करण्याचे आवाहन केले, कारण यामुळेच इफ्फी आंतराष्ट्रीय स्थरावर यशस्वी उपक्रम म्हणून ओळखला जाईल.

यामधून भारतीय चित्रपटांचे विविध पैलू जागतिक प्रेक्षकांसमोर आले पाहिजेत. प्रादेशिक चित्रपटांपासून ते राष्ट्रीय ब्लॉकबस्टरपर्यंत इफ्फीद्वारे भारतीय चित्रपटांचे बहुआयामी रूप समोर आले पाहिजे असं ते म्हणालेत.

मुरुगन यांनी महोत्सवाच्या प्रचारात जागतिक माध्यमांचे महत्त्व अधोरेखित केले. भारतीय चित्रपटांना आंतराष्ट्रीय व्यासपीठ मिळवून द्यायचं असेल आणि जागतिक प्रेक्षकवर्ग जोडायचा असेल तर जगभरातील सर्व माध्यमांशी जोडणं हा एकमेव मार्ग असण्यावर त्यांनी भर दिला.

इफ्फीचा आढावा घेण्यासाठी आलेल्या डॉ. एल. मुरुगन यांनी पणजीत विविध स्थळांना भेट देऊन महोत्सवाचं काम निरखून पाहिलं, यामध्ये खास करून शामाप्रसाद मुखर्जी मैदानाचा समावेश होता जिथे चित्रपट महोत्सवाचे उद्घाटन आणि समारोप होणार आहे.