डिचोली : खोदकामामुळे मये गावातील अंतर्गत रस्ता वाहतुकीस धोकादायक बनला आहे. हा रस्ता सुस्थितीत येईपर्यंत खनिज वाहतूक बंद ठेवावी, अशी मागणी मये-वायंगणी पंचायत सरपंच सीमा आरोंदेकर यांनी पत्रकार परिषदेत केली आहे. यावेळी उपसरपंच संतोष गडेकरही उपस्थित होते. (Goa Mining News Updates)

बेदरकार वाहतूक (Traffic) आणि धूळ प्रदूषण यामुळे त्रस्त बनलेल्या मयेतील जनतेने मंगळवारी सुमारे तासभर खनिज वाहतूक रोखली होती. आता सरपंचांनी सध्या खनिज वाहतुकीस विरोध केला आहे. त्यामुळे आधीच वादातीत बनलेल्या खनिज वाहतुकीसमोर आणखी एक संकट उभे ठाकले आहे. डिचोली (Bicholim) तालुक्यातील मये येथे रस्त्याच्या बाजूने नवीन जलवाहिनी टाकण्याचे काम सध्या सुरु आहे. त्यातच जिओ या दूरसंचार कंपनीतर्फे केबल टाकण्याचेही काम सुरु आहे. सध्या या रस्त्यावरुन खनिज वाहतुकीचा ताण वाढला आहे.

आधीच खोदकामामुळे या रस्त्याची दशा झाली आहे. त्यात खनिज (Mining) वाहतूक यामुळे या रस्त्यावर मोठी समस्या निर्माण होत आहे. केळबायवाडा येथे तर जलवाहिनीचे जुनाट पाईप फुटून पाण्याचीही समस्या निर्माण होत आहे. त्यामुळे लोकांचे हाल होत आहेत, असे सरपंच सीमा आरोंदेकर यांनी स्पष्ट केले आहे. जलवाहिनी आणि केबल टाकून रस्त्याची दुरुस्ती होईपर्यंत खनिज वाहतूक चालूच राहिल्यास समस्येत भर पडण्याची शक्यता आहे.