पणजी : मध्यप्रदेशातील डोंगरी सिंग्रावली येथील खाणीतून कोळसा काढण्यासाठी येत्या १० नोव्हेंबरपर्यंत कंत्राटदार कंपनी निश्चित केली जाणार आहे. मुख्यमंत्री डॉ. प्रमोद सावंत यांनी ही माहिती दिली. राज्य सरकारला हा कोळसा खाणपट्टा केंद्र सरकारने दिला आहे.

कंत्राटदार निश्चिती करण्याची प्रक्रिया सुरू करण्यास आज सार्वजनिक खासगी भागीदारी विभागाच्या सुकाणू समितीच्या बैठकीत ठरवण्यात आले. मुख्यमंत्र्यांच्या अध्यक्षतेखाली ही बैठक झाली. त्याला राज्याचे मुख्य सचिव परीमल राय, विभागाचे संचालक सुरेश शानभोग आदी उपस्थित होते. मुख्यमंत्री म्हणाले, खाणीतील कोळसा बाहेर काढला की राज्य सरकार त्याचा ई-लिलाव पुकारणार आहे. हा व्यवसाय आहे. कोळशाच्या बदल्यात वीज मिळत असेल, तर त्यविषयी निर्णय घेतला जाणार आहे. तूर्त आजच्या बैठकीत या सर्व प्रक्रियेसाठी एक्सपेनो कॅपिटल सर्विसेस प्रा. लि. ही कंपनी सल्लागार म्हणून नियुक्त करण्याचे ठरले आहे. त्याला नंतर मंत्रिमंडळात कार्योत्तर मंजुरी दिली जाईल. खाणीतून कोळसा काढण्यासाठी तीन कंपन्यांनी इच्छा व्यक्त केली आहे. सल्‍लागार कंपनी याबाबत सरकारला अहवाल सादर करून कोणत्या कंपनीकडे काम सोपवल्यास ते राज्याच्या हिताचे ठरू शकते याविषयी मार्गदर्शन करणार आहे