मायक्रोसॉफ्ट इंडियाने मायक्रोसॉफ्ट ट्रान्सलेटरमध्ये कोकणी, मैथिली आणि सिंधी या तीन नवीन भारतीय भाषांचा समावेश करण्याची घोषणा केली आहे. यासोबतच मायक्रोसॉफ्ट ट्रान्सलेटर श्रीलंकेची अधिकृत भाषा सिंहली भाषेचाही समावेश करेल.

मायक्रोसॉफ्टने भारतातील स्थानिक भाषांमधे माहिती नागरिकांसाठी उपलब्ध करुन दिली आहे. आसामी, बंगाली, गुजराती, हिंदी, कन्नड, कोकणी, मैथिली, मल्याळम, मराठी, नेपाळी, ओडिया, पंजाबी, सिंधी, तमिळ, तेलगू आणि उर्दू अशा 16 भारतीय भाषांना मायक्रोसॉफ्ट ट्रान्सलेटर सपोर्ट देते

मायक्रोसॉफ्ट ट्रान्सलेटर (Microsoft Translator) आता 95% पेक्षा जास्त भारतीयांना माहिती मिळवण्याची आणि त्यांच्या मूळ किंवा पसंतीच्या भाषांमध्ये काम करण्याची परवानगी देत आहे. त्यामुळे संगणकीय भाषा भारतात अधिक समावेशक होईल. मायक्रोसॉफ्ट वापरकर्त्यांना रिअल-टाइम संभाषणे, मेनू, मार्ग चिन्हे, वेबसाइट आणि दस्तऐवजांचा अर्थ लावण्यात यामुळे मदत होवू शकते.

कोंकणी भाषा भारतातील 2 दशलक्षाहून अधिक लोक बोलतात. प्रामुख्याने गोवा, महाराष्ट्र आणि कर्नाटक राज्यांमध्ये ही भाषा बोलली जाते. तसेच केरळ आणि गुजरात सारख्या भारतातील इतर भागांमध्येही मोठ्या संख्येने लोक कोंकणी बोलतात.

भारत आणि नेपाळमधील 75 दशलक्षाहून अधिक लोक मैथिली भाषा बोलतात. ही भारतातील बिहार राज्यातील दुसरी सर्वात जास्त बोलली जाणारी भाषा आहे आणि ती झारखंड आणि पश्चिम बंगाल या शेजारील राज्यांमध्ये देखील बोलली जाते. मैथिलीचा विकास जवाहरलाल नेहरू विद्यापीठ (JNU) नवी दिल्ली येथील डॉ. गिरीश नाथ झा यांनी केला होता.

सिंधी ही भारतातील 20 दशलक्ष लोकांद्वारे आणि उपखंडातील इतर अनेक देशांमध्ये बोलली जाते. तर श्रीलंकेत तसेच मलेशिया आणि सिंगापूर सारख्या इतर देशांमध्ये 16 दशलक्षाहून अधिक लोक सिंधी बोलतात.

“आम्ही मैथिली, कोकणी, सिंधी आणि सिंहली भाषा समाविष्ट करण्यासाठी आमच्या भाषा क्षमतांचा विस्तार करत आहोत हे जाहीर करताना आम्हाला आनंद होत आहे. तंत्रज्ञानाचा सर्वव्यापी वापर करून, भारताची वाढ सक्षम करण्यासाठी आम्ही सर्वात प्रगत एआयसह भारतातील भाषा आणि संस्कृतीची विविधता साजरी करतो आणि समर्थन देतो,” असे मायक्रोसॉफ्ट इंडियाचे व्यवस्थापकीय संचालक राजीव कुमार यांनी एका निवेदनात म्हटले आहे.

कंपनीने म्हटले आहे की वापरकर्ते त्यांच्या अॅप्स, वेबसाइट्स, वर्कफ्लो आणि अझुर कॉग्निटिव्ह सर्व्हिसेस ट्रान्सलेटरसह 125 हून अधिक भाषांमध्ये समर्थित कोंकणी, मैथिली, सिंधी आणि सिंहली मजकूर अनुवादित करू शकतात.