Mapusa Police: हरवलेले, चोरीला गेलेले असे एकूण 56 मोबाईल फोन म्हापसा पोलिसांनी मूळ मालकांना परत सुपूर्द केले आहेत. म्हापसा पोलिस स्टेशनच्या हद्दित गेल्या सहा महिन्यात हे फोन हरवले, चोरीला गेलेले होते. पोलिसांना अत्याधुनिक तंत्रज्ञानाचा वापर करत यातील अनेक मोबाईल फोन शोधून काढले आहेत.

म्हापसाचे एसडीपीओ जिवबा दळवी यांनी याबाबत माहिती दिली. त्यानुसार सोमवारी 17 जुलै रोजी म्हापसा पोलिस कर्मचार्‍यांनी म्हापसा पोलिस स्टेशनच्या हद्दीत गेल्या 06 महिन्यांत हरवलेले 56 मोबाईल फोन मूळ मालकांना सुपूर्द करण्यात आले आहेत.

गेल्या सहा महिन्यांपासून हरवलेले मोबाईल फोन परत मिळवण्यासाठी म्हापसा पोलिसांनी पोलिस निरीक्षक सीताकांत नायक यांच्या देखरेखीखाली विशेष टीम तयार केली. या पथकाने गुन्हेगारांचा माग काढण्यासाठी मॉडर्न टेक्नॉलॉजीचा वापर केला.

ऑनलाइन CEIR पोर्टलचा वापर करत पोलिस कर्मचाऱ्यांनी या फोनचा माग ठेवला आणि अखेर संशयितांना ताब्यात घेत मोबाईल फोन हस्तगत केले. पोलिसांनी मूळ मालकांना हे 56 मोबाईल फोन सुपूर्द केले आहेत.

यातील बहुतांश फोन प्रवासात तसेच खरेदी करताना हरवले, चोरीला गेले होते. काही मोबाईल फोन विविध ठिकाणी सापडले होते. मूळ मालकांची पडताळणी करूनच त्यांना हे मोबाईल फोन परत देण्यात आले आहेत.