वास्को: सरकारकडे अवैध बांधकामांची कोणतीही अधिकृत माहिती नाही. ‘माझे घर’ योजनेच्या माध्यमातून ती माहिती गोळा केली जात आहे. परंतु न्यायालयाचा निकाल या योजनेच्या विरोधात गेल्यास संबंधित रहिवासी त्रासात पडतील, असा गंभीर इशारा काँग्रेसचे दक्षिण गोवा खासदार कॅप्टन विरियातो फर्नांडिस यांनी दिला.

मुरगाव तालुक्यात नव्याने सुरू केलेल्या आपल्या कार्यालयाच्या उद्‌घाटनप्रसंगी शनिवारी पत्रकार परिषदेत फर्नांडिस बोलत होते. या कार्यालयाचे उद्‌घाटन माजी उपनगराध्यक्षा शांती मांद्रेकर यांच्या हस्ते करण्यात आले.

यावेळी दक्षिण गोवा काँग्रेस अध्‍यक्ष सावियो डिसिल्वा, प्रदेश सरचिटणीस राजेश वेरेकर, ओबीसी विभाग अध्‍यक्ष नितीन चोपडेकर, दाबोळी काँग्रेस अध्‍यक्ष गोपी नाईक, माजी नगराध्यक्ष नंदादीप राऊत आदी मान्‍यवर उपस्‍थित होते.

दरम्‍यान, आपल्‍या नवीन कार्यालयातून मुरगाव, वास्को, दाबोळी व कुठ्ठाळी मतदारसंघातील लोकांच्या समस्या प्रत्यक्ष ऐकून मार्गदर्शन केले जाईल. आता लोकांना मडगावला जाण्याची गरज नाही, असे फर्नांडिस म्‍हणाले.

लोकसभा निवडणूक काँग्रेस आणि आम आदमी पक्ष एकत्र लढलो. पण आता तो पक्ष काँग्रेसवर टीका करत आहेत. यामागे कोणते राजकारण आहे? असा सवाल कॅ. फर्नांडिस यांनी उपस्‍थित केला. फोंड्याचे भावी आमदार राजेश वेरेकर असतील, असे सूचक विधानही त्‍यांनी केले.