पणजी : ‘माझे घर’ योजनेची राज्यभरात जोरात अंमलबजावणी करण्यासाठी मुख्यमंत्री प्रमोद सावंत यांनी उपजिल्हाधिकारी व मामलेदारांच्या बैठकीत सूचना केल्या. बैठकीत कोमुनिदाद प्रशासकांनाही सहभागी करून कोमुनिदाद जमिनींवरील घरे नियमित करण्यासाठी सरकार गंभीर असल्याचा संदेश सरकारने दिला आहे. तसेच या योजनेचे अर्ज सोमवारपासून सरकारी कार्यालयात उपलब्ध करण्यात येतील, असेही मुख्यमंत्र्यांनी सांगितले.

मंत्रालयातील या बैठकीस महसूलमंत्री बाबूश मोन्सेरात, महसूल सचिव संदीप जॅकीस, उत्तर व दक्षिण गोव्याचे जिल्हाधिकारी, पंचायत संचालनालय व पालिका संचालनालयाचे संचालक, वरिष्ठ अधिकारी उपस्थित होते.

आनंदाचा निर्देशांक वाढेल

मुख्यमंत्री म्हणाले, ‘माझे घर’ ही योजना गोमंतकीयांच्या आयुष्यात आनंद निर्देशांक वाढविणारी ठरेल. पाडकामाच्या भीतीने त्रस्त अनेकांना त्यांच्या स्वतःच्या घरात निर्धास्तपणे राहण्याचा दिलासा या योजनेतून मिळेल. योजनेच्या प्रभावी अंमलबजावणीसाठी सर्व महसूल अधिकारी आणि प्रशासकांनी एकत्रित प्रयत्न करावेत, असेही मुख्यमंत्र्यांनी आवाहन केले.

योजना सामान्यांपर्यंत पोहोचवा : महसूल विभाग आणि संबंधित सर्व अधिकारी मिळून या योजनेचा लाभ प्रत्येक पात्र नागरिकांपर्यंत पोहोचवतील, यासाठी समन्वयाने काम केले जाईल. अधिकाऱ्यांना जागृती वाढवून ही योजना सामान्यांपर्यंत पोहोचविण्याचे निर्देशही मुख्यमंत्र्यांनी दिले.