सासष्टी: एप्रिल महिन्यामध्ये आंबे विक्रीस येण्यास सुरवात होत असते. मडगावच्या पिंपळकट्ट्यावर पहाटे ४ वाजल्यापासून घाऊक आंबे विक्रेत्यांचा बाजारच भरलेला असतो. हा बाजार गेल्या पाच सहा दिवसांपासून सुरू झालेला आहे. आज सकाळी पाहणी केली, तेव्हा आंब्याची आवक वाढलेली दिसली. मात्र, दर सामान्य नागरिकांना न परवडणारे आहेत.

मडगावात घाऊक आंबे बाजार सुरू झाला की वास्को, फोंडा, सासष्टी तालुक्यांतील वेगवेगळ्या गावांतील किरकोळ आंबे विक्रेते गर्दी करतात व आंबे विकत घेण्यात त्यांच्यामध्ये चढाओढ लागलेली दिसते.

एका आंबे विक्रेत्याने सांगितले, की यंदा पाऊस पडल्यामुळे आंब्यांचे पीक कमीच आहे. मानकुराद आंबा मे महिन्यापर्यंतच उपलब्ध असेल.

मुसराद आंबे एप्रिल महिन्याच्या शेवटी किंवा मे महिन्याच्या सुरवातीला येण्याची शक्यता आहे. दुसऱ्या एका विक्रेत्याने सांगितले, की यंदा मानकुराद आंब्याचे पीक खूप कमी आहे. सध्या चांगल्या प्रतीचा मानकुराद आंबा १० ते १५ हजार रुपये शेकडा असा आहे. यंदाच्या आंब्याचा मोसम अनिश्र्चित असल्याचे त्याने स्पष्ट केले. त्याने पुढे सांगितले की, पाऊस पडल्यामुळे झाडावर चढायला मजूर तयार होत नाहीत.

सध्या किरकोळ विक्रेते १४०० ते १८०० रुपये डझन या अशा दरात आंब्यांची विक्री करीत आहेत. चांगल्या प्रतीचा आंबा बाजारात २००० रुपये डझन अशा दरातही विकला जात आहे.

मडगावातील आंब्यांचे रविवारचे दर

मानकुराद

१४०० ते १८०० रुपये डझन

१० ते १५ हजार रुपये शेकडा

मुसराद

१० ते १२ हजार शेकडा

गोवा केसर

४ हजार शेकडा

शिंदुरी

२ ते ३ हजार रुपये शेकडा