सासष्टी: मडगाव येथील एसजीपीडीए घाऊक मासळी मार्केटला सध्या कोणीच वाली नाही अशा पद्धतीने काम चालू आहे. या मार्केटमध्ये पारंपरिक मच्छीमार व गोमंतकीय बोटमालकांची पिळवणूक चालू आहे. त्यामुळे आज वास्को ते बेतुल या किनारी भागातील सर्व पारंपरिक मच्छीमार व बोटमालकांनी फातोर्ड्याचे आमदार विजय सरदेसाई यांची भेट घेतली व त्यांच्याकडे यासंदर्भात चर्चा केली.

विजय सरदेसाई यांनी सांगितले, की एसजीपीडीएने शुल्क दुप्पट केल्याचा अधिकृत निर्णय कधी घेतल्याचे आपल्याला आठवत नाही. सरकारने याकडे जातीने लक्ष पुरवून त्यावर तातडीने उपाययोजना करणे आवश्यक आहे. यापूर्वी घाऊक मासळी विक्रेत्यांची अशीच पिळवणूक करण्यात येत होती. आता त्यांनी पारंपरिक मासळी विक्रेत्यांकडे आपला मोर्चा वळविला आहे. एसजीपीडीए मार्केटमधील किरकोळ मासळी विक्रेत्यांसाठी सोपो शुल्कात वाढ केली आहे.

सोपो गोळा करणाऱ्या कंत्राटदाराच्या नियुक्तीसाठी निविदा काढण्यास एसजीपीडीए चालढकल करीत आहे. याचे कारण ही निविदा प्रक्रिया तांत्रिक व आर्थिकदृष्ट्या व्यवहार्य नाही, असेही सरदेसाई यांचे म्हणणे आहे. यावेळी जुझे फिलिप डिसोझा, सावियो डिसिल्वा, पेले फर्नांडिस उपस्थित होते.

पारंपरिक मच्छीमार व बोटमालकांनी एसजीपीडीएच्या सदस्य सचिवांचीही भेट घेतली. त्याचप्रमाणे त्यांनी एसजीपीडीएचे अध्यक्ष व वास्कोचे आमदार दाजी साळकर यांच्याशी फोनवरून संपर्क साधला. त्यांनी १० एप्रिल रोजी भेटण्याची वेळ दिली आहे.

खंडणी घेण्याचा प्रकार

सध्या या मार्केटमध्ये खंडणी घेणे चालू असून शुल्कात दुप्पट वाढ करण्यात आली आहे. त्याचबरोबर एसजीपीडीए व नगरपालिकेचे दोन्ही कंत्राटदार सोपो गोळा करतात, अशी तक्रार पारंपरिक मच्छीमार व बोटमालकांनी आमदार विजय सरदेसाई यांच्याकडे मांडली.

‘...तर मार्केट चालू देणार नाही’

जर हे शुल्क कमी केले नाही किंवा खंडणी बंद केली नाही व आम्हाला मार्केटमध्ये वावरण्यास मोकळीक दिली नाही, तर आम्ही हे मार्केट चालू देणार नाही, असा इशारा पारंपरिक मच्छीमार व बोटमालकांनी दिला आहे.