मडगाव: कदंब बस चालक सीट बेल्ट न घालताच (नुवे -मडगाव मार्गावर) बसेस चालवत असल्याचे ‘गोवा कॅन’ व कार्मेल उच्च माध्यमिक विद्यालयाच्या विद्यार्थ्यांनी केलेल्या पाहणीत आढळून आले आहे.

गोवा कॅन आणि कार्मेल उच्च माध्यमिक विद्यालयाच्या कन्झ्युमर वेल्फेअर क्लब यांच्या संयुक्त विद्यमाने सोमवारी नुवेतील विद्यालया जवळ ‘रस्ता सुरक्षितता जनजागृती उपक्रम’ राबविण्यात आला. हा उपक्रम ‘गोवाकॅन’च्या ११ दिवसीय रस्ता सुरक्षितता जनजागृती अभियानाचा एक भाग होता.

या उपक्रमात सुमारे ५० विद्यार्थी आणि गोवाकॅन स्वयंसेवकांनी भाग घेतला. रंगीबेरंगी ध्वज, फलक घेऊन वाहन चालकांना आयएसआय मार्क असलेले हेल्मेट आणि सीट बेल्ट वापरण्याचे आवाहन केले.

विद्यार्थ्यांच्या हातातील फलकांवर ‘सावकाश चालवा, जीव वाचवा,’ ‘गती कमी करा, दुर्देवी अपघात टाळा,’ ‘मद्य प्राशन करून, वाहन चालवू नका’ असे संदेश होते. या जनजागृती उपक्रमात अनेक तरुण हेल्मेटशिवाय दुचाकी चालवताना तसेच कदंब बसचालक सीट बेल्ट न घालता बसेस चालवत असल्याचे आढळून आले आहे.

हा उपक्रम गोवा कॅनचे समन्वयक रोनाल्ड मार्टिन्स यांच्या मार्गदर्शनाखाली पार पडला. डायना मारिया रॉड्रिग्स, ई कुतिन्हो यांनी सहकार्य केले. मडगाव वाहतूक उपनिरीक्षक हिरालाल एस. गावडे, हवालदार संदेश गावकर आणि वाहतूक खात्याचे एन्फोर्समेंट (दक्षिण) पर्सी कुतिन्हो आणि चार्ल्स फारिया यांनी उपस्थित राहून उपक्रमाला पाठिंबा दिला.