मडगाव: राय येथे फुटबॉल सामन्यावेळी आयोजित केलेल्या हाऊझीवर मायणा-कुडतरी पोलिसांनी कारवाई करत त्‍या बंद केल्‍या. पोलिसांच्या पथकानं सासष्टी मामलेतदारांसह कार्यक्रमस्थळी येऊन या हाऊझी बंद केल्‍या.

दक्षिण गोवा पोलिस अधीक्षकांनी हाऊझी आयोजकांवर कठोर कारवाईचा इशारा दिला आहे. तसेच दक्षिण गोव्यात हाऊझीला परवानगी दिली जाणार नसल्याचं स्पष्ट केलं आहे. राय येथे रविवारी फुटबॉल सामन्यादरम्यान हाऊझी स्पर्धा आयोजित केली होती.

पोलिसांनी ती थांबविल्यानंतर अनेक फुटबॉलप्रेमी सरकारी अधिकाऱ्यांवर नाराज झाले. सासष्टी येथील इतर फुटबॉल स्पर्धांच्‍यावेळी हाऊझी सुरू असताना अधिकाऱ्यांनी कारवाई केली नाही, असे फुटबॉलप्रेमी म्हणाले.

राय येथील फुटबॉलप्रेमी जेरॉन कुलासो यांनी या कारवाईवर प्रश्नचिन्ह उपस्थित केले. ते म्हणाले की, फुटबॉल क्लबसाठी हाऊझी हे एक महत्त्वाचे निधी संकलन साधन आहे.