मडगाव: मडगाव बाह्य विकास आराखड्यासंदर्भात हरकती व सूचना मागविण्याची दोन महिन्यांची मुदत मंगळवारी संपली तर दुसरीकडे सोनसोडो येथील जमीन पूर्ववत कब्रस्तानसाठी दाखविण्यासंदर्भात झालेल्या मागण्यावर मडगाव (Margao) नगरपालिकेने कोणतीच भूमिका न घेता तटस्थ रहाणे पसंत केले.

मिळालेल्या माहितीनुसार, एसजीपीडीएकडे सोनसोडो (Sonsodo) येथील झोन बदल करून तेथे कमी खर्चाची घरबांधणी करण्याच्या प्रस्तावाला विरोध दर्शवणारे व ती जमीन पूर्ववत कब्रस्तानसाठी कार्याची मागणी करणारे 4 ते 5 अर्ज आले आहेत. एसजीपीडीए मडगाव नगरपालिकेच्या (Municipality) मागणी खेरीज एकतर्फी हा बदल करूं शकत नाही. कारण सुमारे 30 हजार चौ.मी. असलेल्या या जमिनीची नगरपालिका मालक आहे. पण तरीही या प्रकरणात तिला आपली जबाबदारी टाळता येणार नाही. एसजीपीडीए लवकरच या प्रकरणात तिचे मतप्रदर्शन मागणार आहे, कारण झोन बदल करण्याची मागणी करणारे अर्ज आलेले आहेत.

सध्या तरी मडगाव नगरपालिकेने या प्रकरणात कोणतीच भूमिका घेतलेलेली नाही. एकीकडे मुस्लीम संघटना तेथे कब्रस्तान उभारण्याची मागणी करत आहेत. ती जमीन त्यासाठी पुरेशी असल्याचे सांगत आहेत. त्या कारणासाठीच ती संपादलेली होती, याकडेही त्या अंगुली निर्देश करत आहेत. दुसरीकडे पालिका अधिकारी एसजीपीडीए मत मागेल तेव्हा पालिका ते त्यांना कळवील असे सांगत आहेत. मिळालेल्या माहिती नुसार, मुख्याधिकारी आग्नेलो फर्नांडिस यांनी नगराध्यक्ष लिंडन परेरा यांना या संदर्भात टिपणी पाठविली आहे व सोबत पालिकेकडे या संदर्भात आलेले अर्जही जोडले आहेत. मात्र नगराध्यक्षांनी त्यांना पाठविलेल्या उत्तरांत पालिकेने या पूर्वी घेतलेल्या भूमिकेकडे अंगुलीनिर्देश केला आहे.