मडगाव: गोवा घनकचरा व्यवस्थापन महामंडळाने सोनसोडो डंप यार्डवर रेमेडिएशन प्रक्रिया करून राहिलेल्‍या टाकाऊ कचऱ्याची विल्‍हेवाट लावण्‍यासाठी मडगाव नगरपालिकेकडे जागाच नाही. हा कचरा टाकण्यासाठी पालिका जमिनीच्या शोधात आहे.

मान्सूनच्या आगमनापूर्वी सुमारे 1000 ट्रक असलेला हा टाकाऊ कचरा इतर ठिकाणी टाकण्यासाठी मडगाव नगरपालिकेला जमीन शोधावी लागणार आहे. अन्यथा पावसाच्या पाण्याबरोबरच हा कचरा वाहून जाण्याची भीती आहे. त्यामुळे पालिका आता खासगी जमीनमालकांशी हातमिळवणी करून त्यांना जमीन भरण्यासाठी काढून ठेवलेला कचरा घेण्याची विनंती करत आहे. कचरा व्यवस्थापन मंडळाने शनिवारी जुन्या प्रक्रिया प्लांटमधील कचरा हटविण्यास सुरुवात केली आहे.

याबाबत मडगावचे नगराध्यक्ष लिंडन परेरा म्हणाले की, कचरा व्यवस्थापन महामंडळाच्या मदतीने जुना कचरा कमी होत आहे. परंतु त्याचवेळी पालिकेला टाकाऊ कचरा टाकण्यासाठी जमीन अद्याप मिळालेली नाही. यापूर्वी मडगाव येथील कदंब वाहतूक महामंडळाच्‍या मालकीच्या जमिनीचा वापर करण्यात आला होता, असे ते म्हणाले.