Margao Municipal Council

मडगाव: मडगाव नगरपालिकेकडून जाहीर केलेल्या नोटिसीनुसार नगरपालिकेच्या परिसरात उघड्यावर शौच केल्यास १०० रुपये दंड तर उघड्यावर लघुशंका केल्याचे आढळल्यास ५० रुपयांचा दंड भरावा लागेल.

मडगाव पालिकेच्या परिसरात उघड्यावर शौच केल्याचे अनेक प्रकार उघडकीस आले आहेत. परप्रांतीयांकडून मोठ्या प्रमाणात उघड्यावर घाण केल्याचे प्रकार निदर्शनास आलेत. नगरपालिकेच्या क्षेत्रात स्वछता राखण्यासाठी व्यापक उपक्रमांचा एक भाग म्हणून ही सूचना जारी करण्यात आली आहे.

मडगाव पालिकेचे मुख्याधिकारी मेलविन वाझ यांनी जाहीर नोटीस काढून नगरपालिकेच्या परिसरात उघड्यावर शौच किंवा लघवी केल्यास दंडात्मक कारवाई केली जाईल असा इशारा दिलेला आहे.

पहिल्यांदा उघडयावर शौच करण्याचा प्रकार आढळल्यास पालिका १०० रुपयांचा दंड आकारले आणि त्यानंतर असा प्रकार पुन्हा घडल्यास शंभर रुपयांच्या पट्टीत दरवेळी वाढ केली जाईल. तसेच उघड्यावर लघवी करताना आढळल्यास पहिल्यांदा ५० आकारले जातील आणि त्यानंतर हीच बाब पुन्हा घडल्यास दंडाची रक्कम देखील वाढेल.

स्वच्छतेचं पालन व्हावं यासाठी हे पाऊल आवश्यक असल्याचं महापालिकेच्या अधिकाऱ्यांचं म्हणणं आहे. नागरिकांनी सार्वजनिक स्वच्छतागृहांचा वापर करावा आणि पालिकेने दिलेल्या नियमांचे पालन करावे असे आवाहन करण्यात आले आहे. मात्र मडगावात सगळ्याच ठिकाणी सार्वजनिक स्वच्छतागृहांची सोय नसल्याने अनेकांकडून यावर टीका करण्यात आली.