मडगाव: मुंगूल येथे गँगवॉरमधून झालेल्‍या हल्‍ल्‍यामागे कोलव्‍यातील मार्गारिटा या हॉटेलचाही संबंध आहे का याची चौकशी पोलिसांनी करावी, अशी मागणी आम आदमी पक्षाचे बाणावलीचे आमदार व्हेन्झी व्‍हिएगस यांनी केली आहे.

व्हेन्झी व्‍हिएगस यांनी, या प्रकरणी बुधवारी दक्षिण गोव्‍याचे पोलिस अधीक्षक टिकम सिंग वर्मा यांची भेट घेऊन दक्षिण गोव्‍यातील गुन्‍हेगारी विश्‍वातील गँग्‍सच्‍या कारवायांवर नियंत्रण आणण्‍यासाठी पोलिस बंदोबस्‍त वाढवा आणि रात्रीच्‍या गस्‍ती सुरू करा, अशी मागणी केली.

मागच्‍या तीन वर्षात कोलवा आणि मुंगूल परिसरात अशातऱ्हेचे तीन जीवघेणे हल्‍ले झाले आहेत आणि या तिन्‍ही हल्‍ल्‍यांशी कोलव्‍यातील एका हॉटेलचा संबंध आहे. हे हॉटेल पहाटेपर्यंत चालू असते आणि हे हॉटेल गुंडांचा अड्डा बनलेला आहे.

या हॉटेलवरही कारवाई झाली पाहिजे, अशी मागणी त्‍यांनी केली. यावेळी त्‍यांच्‍याबरोबर आपचे जर्सन गोम्‍स व रॉक मास्‍कारेन्‍हस हे उपस्‍थित होते. मुंगूल येथे ज्‍यांच्‍यावर हल्‍ला झाला ते पहाटे उशिरापर्यंत या हॉटेलमध्‍ये होते.