मडगाव: किंग मोमो सेड्रिक दा कॉस्ता यांनी ‘खा, प्या, मजा करा’ असा संदेश दिल्यानंतर रविवारी मडगावात कार्निव्हल जल्लोषात साजरा झाला. यावेळी चित्ररथ व कलाकारांच्या नृत्याचा अविष्काराचा हजारो नागरिकांनी जल्लोषी वातावरणाचा सुखद अनुभव घेतला.

पर्यटनमंत्री रोहन खवटे यांच्या हस्ते या कार्निव्हल मिरवणुकीचे उद्घाटन झाले. यावेळी त्यांनी हा गोव्याचा पारंपरिक कार्निव्हल असल्याचे सांगताना आयोजनात आम्ही कुठलीही कसर ठेवली नाही. मिरवणुकीसाठी देशी-विदेशी पर्यटकही येत आहेत, असे सांगितले.

सार्वजनिक बांधकाम मंत्री दिगंबर कामत यांनी या मिरवणुकीत लोक मोठ्या संख्येने उपस्थित असून लोकांत उत्साह असल्याचे सांगताना, आनंद लुटा असे सांगितले. भाजपचे गोवा प्रदेशाध्यक्ष दामोदर नाईक यांनी हा पारंपरिक कार्निव्हल असून त्या निमित्त ‘खावो, पिवो, मजा करो’ असे आवाहन केले.

नावेलीचे आमदार उल्हास तुयेकर यांनी सर्वांना कार्निव्हलच्या शुभेच्छा दिल्या. मडगावचे नगराध्यक्ष दामोदर शिरोडकर यांनीही कार्निव्हलचा सर्वांनी आनंद लुटावा असे सांगितले. आमदार आलेक्स रेजिनाल्ड लॉरेन्स हेही मिरवणुकीत सहभागी झाले.

चित्ररथ पाहण्यास गर्दी

हॉली स्पिरिट चर्च पासून या कार्निव्हल मिरवणुकीला प्रारंभ झाला व पालिका चौकात सांगता झाली. मिरवणुकीत गोव्याची गौरवशाली व वैभवशाली परंपरेचे दर्शन घडविणारे चित्ररथ होते. यात पर्यावरणाचा संदेश देणारे, तसेच गोव्यातील पारंपारिक व्यवसायावर आधारित पोदेर, खाजेकर, चणेकार, मासे विक्रेते व अन्य चित्ररथांचाही समावेश होता. मिरवणुकीत कुठलाही अनुचित प्रकार घडू नये यासाठी चोख पोलिस बंदोबस्त ठेवण्यात आला होता.