म्हापसा: येथील पालिकेने पालिका कर्मचारी असलेल्या १० बुथस्तरीय अधिकाऱ्यांचे (बीएलओ) वेतन कापले आहे. ऑगस्ट महिन्यात या कर्मचाऱ्यांनी कायदेशीररित्या बीएलओची सेवा बजावली होती. सदर सेवेतील दिवसांचा पगार मासिक वेतनातून कापला गेला आहे.

सरकारच्या निर्देशानुसार विधानसभा मतदारसंघाच्या साहाय्यक निवडणूक अधिकाऱ्यांमार्फत म्हापसा नगरपालिकेतील ५ अधिकारी व ५ पर्यवेक्षक अशा दहा कर्मचाऱ्यांची बुथस्तरीय अधिकारी म्हणून नियुक्ती करण्यात आली आहे. या नेमणुकीचे पत्र संबंधित साहाय्यक निवडणूक अधिकाऱ्यांकडून पालिकेला सादर करण्यात आले आहे.

या दहा अधिकाऱ्यांपैकी ५ जण दर शुक्रवारी, तर पर्यवेक्षक असलेले ५ जण दर शुक्रवार व शनिवारी बीएलएओची सेवा मामलेदार कार्यालयात बजावतात. यातील ८ जण म्हापसा मतदारसंघात, एक पर्वरी तर एक डिचोली मतदारसंघात बीएलओ म्हणून कार्यरत आहे.

या कर्मचाऱ्यांची ऑगस्ट महिन्याच्या वेतनातून बीएलओंच्या सेवा काळाचा पगार कापण्यात आला आहे. या एकंदरीत अन्यायामुळे बीएलओ कर्मचाऱ्यांमध्ये नाराजी पसरली आहे. मामलेदार

असलेले साहाय्यक निवडणूक अधिकाऱ्यांनी या प्रकरणी हस्तक्षेप करावा व आम्हाला हक्काचा पूर्ण मासिक पगार मिळवून द्यावा, अशी या कर्मचाऱ्यांची मागणी आहे.