म्हापसा: राष्ट्रीय महामार्ग क्रमांक 66 वर म्हापशातील पेडे येथील जंक्शन पादचाऱ्यांबरोबरच वाहनचालकांच्या दृष्टीने जीवघेणे तथा त्रासदायक बनलेले आहे. काही मूलभूत सुविधांचे निर्माण त्या ठिकाणी करण्यात शासकीय यंत्रणा अपयशी ठरल्याने या अपघातप्रवण क्षेत्रात अनेकविध समस्या निर्माण झालेल्या आहेत. हल्लीच्या काळात तिथे कित्येक अपघात झालेले आहेत.

गेल्या सुमारे चार दिवसांत त्या ठिकाणी तीन-चार वाहन अपघात घडलेले आहेत. त्या भागात गतिरोधक अथवा सूचनाफलकांची पुरेशी सोय केली नसल्याने भरधाव गतीने येणाऱ्या वाहनांमुळे अपघात होत आहेत. राष्ट्रीय महामार्गाचा हा भाग गेल्या सुमारे चार महिन्यांपासून खुला केल्यापासून तेथील वाहतूक वाढलेली आहे व त्यामुळेच तिथे कित्येक अपघात होत आहेत. त्या ठिकाणी सध्या दरदिवशी किमान एक लहान-मोठा अपघात होत आहे, ही वस्तुस्थिती आहे.

म्हापशातील नागरिक शेखर नाईक म्हणाले, या जंक्शनच्या ठिकाणी सुमारे आठ रस्त्यांवरून येणारे लोक एकत्रित होतात. परंतु, त्यांना हा महामार्ग पार करणे जीवघेणे ठरलेले आहे. तसेच तेथील सर्व्हिस रोडही अतिशय कमी रुंदीचा आहे.

म्हापसा येथील वाहतूक विभागाच्या अधिकाऱ्यांनी ही बाब भारतीय राष्ट्रीय महामार्ग प्राधिकरणाच्या अधिकाऱ्यांच्या निदर्शनास आणून दिली आहे. त्या जंक्शनच्या ठिकाणी वाहनचालकांना भेडसावणाऱ्या समस्याही त्यांनी प्राधिकरणाच्या निदर्शनास आणून दिल्या आहेत. त्यासंदर्भात कोणत्या उपाययोजना घेतल्या जाऊ शकतात, त्याबाबतच्या सूचनाही वाहतूक विभागाने प्राधिकरणाला केल्या आहेत.

राष्ट्रीय महामार्गाचे साहाय्यक अभियंता दिनेश तार यांनी यासंदर्भात स्पष्ट केले आहे, की या जंक्शनच्या ठिकाणी उद्‍भवणाऱ्या समस्यांची आम्हाला जाणीव आहे.